රනිල්ගේ ලන්ඩන් ගමනේ රාජ්‍ය මුදල් අවභාවිත චෝදනාව - නීතිපති උපදෙස් සඳහා නඩුව නොවැම්බර් 11ට කල් තබයි...

හිටපු ජනාධිපති රනිල් වික්‍රමසිංහගේ 2023 ලන්ඩන් සංචාරයක් සඳහා රාජ්‍ය මුදල් වැය කළ බවට එල්ල වී ඇති චෝදනාව සම්බන්ධයෙන් අපරාධ පරීක්ෂණ දෙපාර්තමේන්තුව පවත්වාගෙන යන විමර්ශනයට අදාළ නඩුව නීතිපති උපදෙස් ලබාගැනීම සඳහා නොවැම්බර් 11 වැනිදා යළි කැඳවීමට කොළඹ කොටුව මහේස්ත්‍රාත් අධිකරණය අද (30) නියෝග කළේය.

</p>

<p>

කොළඹ කොටුව මහේස්ත්‍රාත් පසන් අමරසේන ඉදිරියේ නඩුව කැඳවූ අවස්ථාවේ හිටපු ජනාධිපති රනිල් වික්‍රමසිංහ සහ හිටපු ජනාධිපති ලේකම් සමන් ඒකනායක අධිකරණයේ පෙනී සිටියහ.

</p>

<p>

නඩුව සම්බන්ධයෙන් ගත යුතු ඉදිරි නීතිමය පියවර පිළිබඳ නීතිපතිවරයාගේ උපදෙස් ලබාගැනීම සඳහා නඩුව නොවැම්බර් 11 වැනිදා යළි කැඳවීමට අධිකරණය නියම කළේය.

</p>

<p>

<span style="color:#dc2626">නීතිපති නඩුව අදිනව ද?</span>

</p>

<p>

මෙම නඩුව මීට පෙර ජූලි 8 වැනිදා කැඳවූ අවස්ථාවේ අපරාධ පරීක්ෂණ දෙපාර්තමේන්තුව අධිකරණයට දන්වා තිබුණේ සිද්ධිය සම්බන්ධ විමර්ශන අවසන් කර නඩු ගොනුව නීතිපතිවරයා වෙත යොමු කර ඇති බවය.

</p>

<p>

එදින පැමිණිල්ල වෙනුවෙන් පෙනී සිටි ජ්‍යෙෂ්ඨ රජයේ නීතිඥ සමදාරි පියසේන, නීතිපතිවරයාගේ ස්ථාවරය අධිකරණයට දැනුම් දීම සඳහා දිනයක් ලබාදෙන ලෙස ඉල්ලා සිටියාය. ඒ අනුව නඩුව සැප්තැම්බර් 30 වැනිදා කැඳවීමට නියම කර තිබිණි.

</p>

<p>

<span style="color:#dc2626">චෝදනාවට පදනම් වූ ලන්ඩන් ගමන</span>

</p>

<p>

විමර්ශනයට පදනම් වී ඇත්තේ රනිල් වික්‍රමසිංහ ජනාධිපති ධුරයේ සිටියදී 2023 සැප්තැම්බර් මාසයේ සිදුකළ විදේශ සංචාරයක කොටසකි.

</p>

<p>

ඔහු කියුබාවේ හවානා නුවර පැවති G77 සමුළුවට සහ එක්සත් ජනපදයේ නිව්යෝර්ක් නුවර පැවති එක්සත් ජාතීන්ගේ මහා මණ්ඩල සැසිවාරයට සහභාගි වීමෙන් අනතුරුව බ්‍රිතාන්‍යයට ගොස් තිබිණි. එහිදී ඔහුගේ බිරිඳවන මහාචාර්ය මෛත්‍රී වික්‍රමසිංහ සම්බන්ධයෙන් Wolverhampton විශ්වවිද්‍යාලයේ පැවති උපාධි ප්‍රදාන උත්සවයකට සහභාගි වී තිබේ.

</p>

<p>

CID විමර්ශනයේ මූලික ප්‍රශ්නය වී ඇත්තේ නිල විදේශ සංචාරයකින් පසුව සිදුකළ මෙම බ්‍රිතාන්‍ය සංචාරය පෞද්ගලික කටයුත්තක් ද, නිල කටයුත්තක් ද යන්න සහ ඒ සඳහා රාජ්‍ය මුදල් වැය කිරීම නීත්‍යනුකූල ද යන්නය.

</p>

<p>

විමර්ශකයන්ගේ චෝදනාව අනුව එම සංචාරයට ජනාධිපති ලේකම් කාර්යාලය ඇතුළු රාජ්‍ය මූලාශ්‍රවලින් රුපියල් මිලියන 16කට වැඩි මුදලක් වැය වී තිබේ. වාර්තා වන මුදල රුපියල් මිලියන 16.9ක් ලෙසත්, තවත් අධිකරණ වාර්තා රුපියල් මිලියන 16.6කට වැඩි මුදලක් ලෙසත් සඳහන් කරයි.

</p>

<p>

<span style="color:#dc2626">රනිල්ගේ පාර්ශ්වයේ තර්කය</span>

</p>

<p>

කෙසේ වෙතත්, මෙම චෝදනාව රනිල් වික්‍රමසිංහගේ නීතිඥයන් විසින් ප්‍රතික්ෂේප කර තිබේ.

</p>

<p>

ඔවුන් අධිකරණයට ඉදිරිපත් කර ඇති ස්ථාවරය වන්නේ බ්‍රිතාන්‍ය විශ්වවිද්‍යාලයෙන් ලැබුණු නිල ආරාධනයක් අනුව එම අවස්ථාවට සහභාගි වූ බවත්, ජනාධිපතිවරයකුගේ නිල සහ පෞද්ගලික සංචාර අතර මෙම අවස්ථාවේ පැහැදිලි වෙන් කිරීමක් කළ නොහැකි බවත්ය. මහාචාර්ය මෛත්‍රී වික්‍රමසිංහ සිය වියදම් තමන් විසින්ම දරා ඇති බවද වික්‍රමසිංහගේ පාර්ශ්වය පවසා තිබේ.

</p>

<p>

මීට පෙර අධිකරණයේදී විත්තියේ ජනාධිපති නීතිඥ අනුජ ප්‍රේමරත්න තවත් කරුණක් මතු කර තිබිණි. විමර්ශනයට ලක්වන වියදමෙන් සැලකිය යුතු කොටසක් වාහන සඳහා වැය වූ බව CID පාර්ශ්වයෙන් සඳහන් වුවද, අදාළ වාහන බ්‍රිතාන්‍ය රජය විසින් සපයා තිබූ බව පෙන්වන ලේඛන තමන් සතුව ඇති බව ඔහු අධිකරණයට දැනුම් දී තිබේ. එම ලේඛනද විමර්ශනයේදී සලකා බලන ලෙස විත්තිය ඉල්ලා තිබිණි.

</p>

<p>

<span style="color:#dc2626">හිටපු ජනාධිපතිවරයකු පළමු වරට රක්ෂිත බන්ධනාගාරයට

</span>

</p>

<p>

මෙම විමර්ශනය සම්බන්ධයෙන් ප්‍රකාශයක් ලබාදීම සඳහා 2025 අගෝස්තු 22 වැනිදා CIDයට පැමිණි රනිල් වික්‍රමසිංහ එදින අත්අඩංගුවට ගනු ලැබීය. පසුව කොළඹ කොටුව මහේස්ත්‍රාත් අධිකරණයට ඉදිරිපත් කිරීමෙන් අනතුරුව අගෝස්තු 26 දක්වා රක්ෂිත බන්ධනාගාරගත කෙරිණි.

</p>

<p>

ඒ අනුව ශ්‍රී ලංකාවේ හිටපු රාජ්‍ය නායකයකු අත්අඩංගුවට ගෙන රක්ෂිත බන්ධනාගාරගත කළ පළමු අවස්ථාව ලෙසද එය ඉතිහාසයට එක්විය.

</p>

<p>

රක්ෂිත බන්ධනාගාරගත කිරීමෙන් පසුව ඇති වූ සෞඛ්‍ය තත්ත්වයක් හේතුවෙන් ඔහු රෝහල්ගත කෙරුණු අතර, අගෝස්තු 26 වැනිදා නඩුව කැඳවූ අවස්ථාවේ වෛද්‍ය වාර්තාද සලකා බැලූ අධිකරණය රුපියල් මිලියන පහ බැගින් වූ ශරීර ඇප තුනක් මත ඔහු මුදා හැරීමට නියෝග කළේය.

</p>

<p>

හිටපු ජනාධිපති ලේකම් සමන් ඒකනායකගෙන් සහ හිටපු ජනාධිපති පෞද්ගලික ලේකම් සැන්ඩ්‍රා පෙරේරාගෙන්ද CIDය මෙම විමර්ශනයට අදාළව ප්‍රකාශ ලබාගෙන තිබිණි. මේ වනවිට සමන් ඒකනායකද මෙම අධිකරණ ක්‍රියාවලියේ විමර්ශනයට ලක්වන පාර්ශ්වකරුවෙකු ලෙස නම් කර තිබේ.

</p>

<p>

ඒ අනුව දැන් නඩුවේ ඊළඟ වැදගත් පියවර වන්නේ සම්පූර්ණ කරන ලද CID විමර්ශන ගොනුව සම්බන්ධයෙන් නීතිපතිවරයා ලබාදෙන උපදෙසයි. ඒ මත රනිල් වික්‍රමසිංහ සහ සමන් ඒකනායක සම්බන්ධයෙන් ඉදිරි නීතිමය ක්‍රියාමාර්ග ගන්නේද, එසේ නම් ඒ කවර ආකාරයෙන්ද යන්න තීරණය වනු ඇත. නඩුව නොවැම්බර් 11 වැනිදා යළි කැඳවීමට නියමිතය.