දුම්රිය වර්ජනයේ අලුත්ම තත්ත්වය කුමක් ද?

වර්ජනයක් ක්‍රියාත්මක වුවද කාර්යාල දුම්රිය බොහෝමයක් සාමාන්‍ය පරිදි ධාවනය වන බව දුම්රිය දෙපාර්තමේන්තුව පවසයි. එහෙත් දුම්රිය සාමාන්‍යාධිකාරීවරයා ඉවත් කිරීම ඇතුළු ඉල්ලීම් මත සමිති 27ක් එකතුව ආරම්භ කළ පැය 48ක සංකේත වැඩවර්ජනය අද (17) දිනයේ ඉදිරියට යයි.

</p>

<p></p>

<p>

දුම්රිය ධාවන අධිකාරී අසංක සමරසිංහ මාධ්‍යයට පැවසුවේ එක් දුම්රියක් හැර අනෙක් සියලු කාර්යාල දුම්රියන් සාමාන්‍ය පරිදි ධාවනයට සැලසුම් කර ඇති බවය. දෙපාර්තමේන්තුවට අනුව මුහුදුබඩ මාර්ගයේ අද පෙරවරුවේ ගමන්වාර 13ක්, හලාවත මාර්ගයේ 11ක්, ප්‍රධාන සහ උතුරු මාර්ගයේ 15ක් සහ කැලණිවැලි මාර්ගයේ 7ක් ධාවනය කිරීමට සැලසුම් කර තිබේ.

</p>

<p></p>

<p>

වර්ජනය ඊයේ (16) මධ්‍යම රාත්‍රියේ සිට ආරම්භ විය. එය සැප්තැම්බර් 17 සහ 18 දෙදිනට සීමා වූ සංකේත වැඩවර්ජනයකි. දුම්රිය ස්ථානාධිපතිවරු, නියාමකවරු, රියදුරන්, රත්මලාන වැඩපොළ සේවකයන් සහ දුම්රිය ස්ථාන සේවකයන් නියෝජනය කරන සමිති මේ ක්‍රියාමාර්ගයට සහභාගී වෙති.

</p>

<p></p>

<p>

ප්‍රධාන ඉල්ලීම් දෙකකි. පළමුවැන්න වත්මන් දුම්රිය සාමාන්‍යාධිකාරී රවීන්ද්‍ර පද්මප්‍රිය ධුරයෙන් ඉවත් කිරීමය. දෙවැන්න දුම්රිය ස්ථානාධිපති සංගමයේ ප්‍රධාන ලේකම් කසුන් චාමර ජයසේකරට මාධ්‍යයට ප්‍රකාශ කිරීම නිසා නිකුත් කළ පැහැදිලි කිරීම් ලිපිය අස්කර ගැනීමය. සමිති පවසන්නේ සාමාන්‍යාධිකාරීවරයා සමඟ ගැටලු සාකච්ඡා කිරීමට අවස්ථාවක් නොලැබුණු බවය. දුම්රිය ප්‍රමාද, දුම්රිය අවලංගු කිරීම්, එන්ජින් සහ කෝච්චි හිඟය සහ සේවක විශ්‍රාම වැටුප් ප්‍රමාදයන් නිසා දුම්රිය ගමනාගමනයේ මෙන්ම සේවකයන් අතරත් ප්‍රශ්න රාශියක් ඇති වී තිබෙන බවය.

</p>

<p></p>

<p>

ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක සාමාන්‍යාධිකාරීවරයා ඉවත් කිරීමේ ඉල්ලීමට එකඟ විය නොහැකි බව ප්‍රකාශ කර තිබේ. සැප්තැම්බර් 14 වැනිදා ප්‍රවාහන අමාත්‍යාංශ ලේකම්වරයා සමඟ පැවති සාකච්ඡාවෙන්ද අවසාන තීරණයක් නොලැබුණි. සමිති එම ඉල්ලීම ප්‍රතික්ෂේප කර වර්ජනය ඉදිරියට ගෙන යන බව දැනුම් දුන්හ.

</p>

<p></p>

<p>

දුම්රිය ස්ථානාධිපතිවරුන්ගේ සංගමයේ සභාපති සුමේධ සෝමරත්න පැවසුවේ වර්ජනය ආරම්භයට පෙරම ඊයේ සවස සහ රාත්‍රියේ දුම්රිය කිහිපයක් අවලංගු වී මගීන් අපහසුතාවයට පත්වූ බවය.

</p>

<p></p>

<p>

“අපේ වර්ජනය ආරම්භ කිරීමට පෙර ඊයේ දුම්රිය ගණනාවක් අවලංගු වෙලා, මගීන් වැඩවර්ජනයට කලින්ම අපහසුතාවයට පත්වෙලා. මෙවැනි කාරණා නිසා තමයි අපි මේ දුම්රිය සාමාන්‍යාධිකාරීවරයා ඉවත් කරන්න කියන්නේ. අද දිනේ මේ වෙද්දිත් දුම්රිය සාමාන්‍යාධිකාරි සහ විධායක නිලධාරීන් දඟලන්නේ දුම්රිය ධාවනය කරන්න. නමුත් දුම්රිය ආදායම, මගීන්ට අවශ්‍ය පහසුකම් සපයන්න කිසිදු වැඩපිළිවෙලක් සකස් කරලා නෑ. දුම්රිය ස්ථානාධිපතිවරු බහුතරයක් වැඩවර්ජනයට සහභාගී වෙලා තියෙනවා. රජයට හිතවාදී ස්ථානාධිපතිවරු කිහිපදෙනෙක් මේ වැඩවර්ජනය කඩාකප්පල් කරමින්, දුම්රිය සාමාන්‍යාධිකාරීවරයා නැවත තබාගැනීමට අවශ්‍ය කටයුතු සලසනවා. අපි විශ්මිත වෙනවා. මේක දේශපාලන අරමුණකින් නෙමෙයි දෙපාර්තමේන්තුව ගොඩගැනීමේ අරමුණින් ක්‍රියාත්මක වුණ වෘත්තීය සටනක්.”

</p>

<p></p>

<p>

<span style="color:#dc2626">ඊයේ අවලංගුවුන සේවා</span>

</p>

<p></p>

<p>

ඊයේ රාත්‍රියේ අවලංගු වූ සේවා අතර කොළඹ කොටුවෙන් පස්වරු 7.00ට මඩකලපුවට, පස්වරු 8.00ට කන්කසන්තුරයට සහ රාත්‍රී 9.30ට මඩකලපුවට යන රාත්‍රී තැපැල් දුම්රිය මෙන්ම රාත්‍රී 11.00ට රඹුක්කනට යන දුම්රියද ඇතුළත් විය. කොටුව දුම්රිය ස්ථානයට පැමිණි මගීන් ඊයේ සවසත් පීඩාවට පත්විය.

</p>

<p></p>

<p>

වෘත්තීය සමිති පවසන්නේ දෛනික දුම්රිය ගමන්වාර ප්‍රමාණය පෙර 450ක් පමණ වූ තැනකින් දැන් 184ක් පමණට පහත වැටී ඇති බවය. ලොකෝමෝටිව් නිලධාරී සංගමයේ ලේකම් එස්.ආර්.සී.එම්. සේනානායක දින 14ක දැනුම්දීමක් ලබා දී තිබුණද අදාළ ගැටලුවලට විසඳුමක් නොලැබුණු බව පැවසීය. සීසන් ටිකට්පත් නිකුත් කිරීම සම්බන්ධයෙන් මූල්‍ය නීති විරෝධී ක්‍රියා පිළිබඳ චෝදනාද ඔවුන් ඉදිරිපත් කරති.

</p>

<p></p>

<p>

දුම්රිය තාක්ෂණික හා මෙහෙයුම් සේවා සංගමයද මෙම ක්‍රියාමාර්ගයට සහය දක්වමින් සාමාන්‍යාධිකාරීවරයාගේ පාලනය සහ විශ්‍රාම වැටුප් කටයුතු ප්‍රමාදය ගැන අවධානය යොමු කළේය. ඉතිහාසයේ ප්‍රථම වතාවට දුම්රිය මගී සංගම්ද මෙම වර්ජනයට සහය දක්වා ඇති බව සමිති පවසති. රජය ඉල්ලීම් නොසලකා හැරියහොත් අඛණ්ඩ වැඩවර්ජනයකට යාමට සූදානම් බවද ඔවුන් අනතුරු අඟවති.

</p>

<p></p>

<p>

රවීන්ද්‍ර පද්මප්‍රිය 2025 අගෝස්තුවේ දුම්රිය සාමාන්‍යාධිකාරී ධුරයට පත් විය. එතෙක් ධුරය දැරූ ධම්මික ජයසුන්දර ඉවත් කිරීමෙන් පසු ඔහු පත් කෙරිණි. වෘත්තීය සමිති පවසන්නේ දෙපාර්තමේන්තුව ගොඩනැගීමේ අරමුණින් සාමාන්‍යාධිකාරීවරයා ඉවත් කිරීම මූලික කරගත් මෙම සටන ක්‍රියාත්මක වන බවය. රජයේ පැත්තෙන් තවමත් සාමාන්‍යාධිකාරීවරයා ඉවත් කිරීම පිළිබඳ තීරණයක් නැත. වර්ජනය හෙට (18) මධ්‍යම රාත්‍රිය දක්වා ක්‍රියාත්මක වීමට නියමිතය.