අද සිට විදුලි කප්පාදුව අවශ්‍ය නැත – ලක්විජය බලාගාරයේ ජනන යන්ත්‍රයක් ජාතික පද්ධතියට එක් වේ!
අද පස්වරු 1.31ට පමණ අදාළ ජනන යන්ත්‍රය පූර්ණ ධාරිතාවයෙන් ක්‍රියාත්මක වූ බවය. මෙයින් විදුලි සැපයුම සාමාන්‍ය ලෙස පවත්වාගෙන යා හැකි බවද සමාගම පවසයි.
LSN Sri Lanka ·
නොරෝච්චෝලේ ලක්විජය ගල් අඟුරු බලාගාරයේ අංක 2 ජනන යන්ත්‍රය ජාතික විදුලි පද්ධතියට එක් කර, මෙගාවොට් 270ක පූර්ණ ධාරිතාවයෙන් ක්‍රියාත්මක කිරීමට හැකි වූ බැවින් අද සිට විදුලි ඉල්ලුම කළමනාකරණය (විදුලි කප්පාදුව) අවශ්‍ය නොවන බව ජාතික පද්ධති ක්‍රියාකරු (NSO) සමාගම අද (ඔක්තෝබර් 22) ප්‍රකාශ කළේය.
</p>
<p>
සමාගම නිකුත් කළ නිවේදනයක සඳහන් වන්නේ, අද පස්වරු 1.31ට පමණ අදාළ ජනන යන්ත්‍රය පූර්ණ ධාරිතාවයෙන් ක්‍රියාත්මක වූ බවය. මෙයින් විදුලි සැපයුම සාමාන්‍ය ලෙස පවත්වාගෙන යා හැකි බවද සමාගම පවසයි. ඔක්තෝබර් 19 සිට 21 දක්වා ක්‍රියාත්මක වූ ඉල්ලුම කළමනාකරණ ක්‍රියාමාර්ග සඳහා පාරිභෝගිකයින්ගේ සහයෝගයට ස්තූතිය පළ කරමින්, එම අවස්ථාවේ ඇති වූ අපහසුතාවය පිළිබඳව කනගාටුව ප්‍රකාශ කළේය.
</p>
<p>
පසුගිය සෙනසුරාදා (ඔක්තෝබර් 17) පෙරවරු 11.43ට පමණ සම්ප්‍රේෂණ පද්ධතියේ ඇති වූ අසමතුලිතතාවයක් හේතුවෙන් දිවයින පුරා විදුලිය බිඳ වැටුණි.
</p>
<p>
මෙම අසාර්ථකත්වය නිසා නොරෝච්චෝලේ ලක්විජය බලාගාරයේ ජනන යන්ත්‍ර තුනම අක්‍රිය විය. බලාගාරයේ මුළු ධාරිතාව මෙගාවොට් 900ක් පමණ වන අතර, එය ජාතික පද්ධතියට ලබා දෙන සැලකිය යුතු දායකත්වයක් නිසා විදුලි සැපයුමේ හිඟයක් ඇති විය.මේ හේතුවෙන් ජාතික පද්ධති ක්‍රියාකරු සමාගමේ ඉල්ලීම මත මහජන උපයෝගීතා කොමිසම (PUCSL) ඔක්තෝබර් 19 සිට 21 දක්වා දින තුනක් සඳහා දිනකට පැයක විදුලි කප්පාදුවක් අනුමත කළේය.
</p>
<p>
රට කලාප හතරකට බෙදා පස්වරු 4.30 සිට රාත්‍රී 9.00 දක්වා කාලය තුළ මෙම කප්පාදුව ක්‍රියාත්මක කෙරිණි. රෝහල් සහ අත්‍යවශ්‍ය සේවා ස්ථාන මෙයින් බැහැර විය.බලාගාරය නැවත සක්‍රීය කිරීම සඳහා තාක්ෂණික ක්‍රියාමාර්ග ගනිමින් සිටියදී බලශක්ති, වරාය සහ සිවිල් ගුවන් සේවා අමාත්‍ය අනුර කරුණාතිලක ඊයේ (21) බලාගාරයට ගොස් ප්‍රතිසංස්කරණ කටයුතු නිරීක්ෂණය කළේය.
</p>
<p>
අද ජනන යන්ත්‍රයක් සාර්ථකව ජාතික පද්ධතියට එක් කිරීමෙන් විදුලි සැපයුම සාමාන්‍ය තත්ත්වයට පත්ව ඇත.