මර්ධනයෙන් හොඳටම බැට කාපු ඉතිහාසයක් ඇති අපි නීති ගෙනෙන්නේ බලය නැති අවස්ථාවක දි එම නීති සමාජයට බලපාන්නේ කොහොමද කියලා හොඳට කල්පනා කරලා... ජනපති...

රජය විසින් ගෙන එනු ලබන නීති සහ ක්‍රියාමාර්ග කිසිවකින් තමාට, ආණ්ඩුවට, පොලිසියට හෝ වෙනත් රාජ්‍ය දෙපාර්තමේන්තුවලට අනිසි බලයක් ලබාගැනීමේ අරමුණක් කිසිසේත්ම නොමැති බවත්, බලය යනු චිරාත් කාලයක් පවතින දෙයක් නොව, ජනතා කැඳවීමකදී ඕනෑම මොහොතක අත්හැරිය යුතු දෙයක් බැවින් බලයේ සිටිමින් නීති සම්පාදනය කිරීමේදී, තමන් බලයේ නොමැති කාලයක එම නීති තමන්ට හෝ සමස්ත සමාජයට කෙබඳු බලපෑමක් ඇති කරනු ඇත්දැයි යන්න පිළිබඳව නිරන්තරයෙන් කල්පනා කළ යුතු යන අවබෝධය තමන්ට සහ රජයට ඇති බවත් ජනාධිපති අනුර කුමාර දිසානායක පැවසුවේය.

</p>

<p>

එබැවින් රජය නීති සම්පාදනය කරන්නේ ජනතා සුභසිද්ධිය වෙනුවෙන් පමණක් බව ජනාධිපතිවරයා මෙහිදී අවධාරණය කර සිටියේය.

</p>

<p>

ජනාධිපති අනුර කුමාර දිසානායක මේ බව සඳහන් කළේ අද (05) පස්වරුවේ අරලියගහ මන්දිරයේ පැවති “ඉවත්වෙනු” මෙහෙයුමේ වසරක ඇගයුම, ආගමික සමුළුව අමතමිනි.

</p>

<p>

මෙහිදී ජනාධිපතිවරයා පෙන්වා දුන්නේ වත්මන් නීතිමය තත්ත්වයන් අනුව, ප්‍රථමයෙන්ම අප රටට ‘සංවිධානාත්මක අපරාධ වැළැක්වීමේ පනතක්’ අවශ්‍යද නැද්ද යන්න පිළිබඳව සමාජයක් ලෙස තීරණය කළ යුතු බවය. සංවිධානාත්මක අපරාධකරුවන්ගෙන් ආරක්ෂාව හෝ නොයෙකුත් වරප්‍රසාද ලබන සුළු පිරිස හැර රටේ සෙසු සමස්ත ජනතාවම ඊට ‘ඔව්’ යැයි පිළිතුරු දෙනු ඇතැයි තමන් විශ්වාස කරන බව ද ජනාධිපතිවරයා පැවසීය.

</p>

<p>

එම පනතේ ඇතුළත් ප්‍රතිපාදන වැඩිද නැතහොත් අඩුද යන්න පිළිබඳව සංවාද කිරීමට රජය සූදානම් බව කී ජනාධිපතිවරයා ඒ සම්බන්ධයෙන් දැනටමත් සංශෝධන තුනක් පිළිබඳ එකඟතාවය ශ්‍රේෂ්ඨාධිකරණය හමුවේ ප්‍රකාශ කිරීමට බලාපොරොත්තු වන බව අවධාරණය කළේය.

</p>

<p>

මෙහිදී වැඩිදුරටත් අදහස් දැක්වු ජනාධිපති අනුර කුමාර දිසානායක මෙසේ ද පැවසීය.

<figure style="margin:1.5rem 0;text-align:center"><img src="https://scontent.fcmb2-2.fna.fbcdn.net/v/t39.99422-6/886655302_981988734931408_1732774418172034676_n.png?stp=dst-jpg_tt6&cstp=mx2048x1365&ctp=s2048x1365&_nc_cat=108&_nc_map=urlgen_bucketless&ccb=1-7&_nc_sid=f727a1&_nc_ohc=nqxevpdSCRoQ7kNvwHnO3Zj&_nc_oc=AdozDh3_Uq17ou54d4T4rsFu-aZVU8MXnyar9u1dHIhIHh-iMdzBFDwg6cO3bxOP9FQ&_nc_zt=14&_nc_ht=scontent.fcmb2-2.fna&_nc_gid=XrFdN115l-icVSTtV8QyCQ&_nc_ss=7a2a8&oh=00_AQRgqI5HB6kQOLhGuiTpnzuIiKsPpWMIwldfKJPuQgAaCw&oe=6AF282AB" alt="" style="max-width:100%;border-radius:6px" /><figcaption style="font-size:0.85em;color:#6b7280;margin-top:0.4rem"></figcaption></figure>

,

</p>

<p>

අපේ ස්වාමීන්වහන්සේලා ඇතුළු සියලු පූජ්‍ය ප්‍රසාදීන්වහන්සේ අද මෙහි රැස්ව සිටින්නේ විශාල ව්‍යසනයක් පරාජයට පත් කිරීමේ අරමුණ ඇතිවයි. පළමුකොටම අපගේ ආරාධනය පිළිගෙන ඔබවහන්සේලා මෙම අවස්ථාවට වැඩම කිරීම පිළිබඳ අපේ ගෞරවපුර්වක ස්තූතිය පළ කර සිටිනවා.

</p>

<p>

මෙහි වැඩම කර සිටින දහස් සංඛ්‍යාත මහා සංඝරත්නය සහ පූජකතුමන්ලා දෙස බැලූ විට අප හමුවේ තිබෙන අභියෝගය විශාල වූවාට එය පරාජය කළ හැකියි කියන දැඩි විශ්වාසය අප තුළ ඇති වෙනවා.

</p>

<p>

මීට වසරකට පමණ පෙර අපි මෙම ව්‍යසනය පරාජයට පත් කිරීම සඳහා ඒකාබද්ධ මෙහෙයුමක් දියත් කළා. හැමදාමත් මත්ද්‍රව්‍ය අත්අඩංගුවට ගැනිම් සිදු වුණා, ඒ වගේම මෙම උවදුර පරාජයට පත් කිරීම සඳහා විවිධ කාර්යයන් කරමින් තිබුණා. හැබැයි අපි සංඛ්‍යා දත්ත දෙස ආපසු හැරී බැලූවිට හැමදාමත් සිදුවී තිබෙන දෙය වන්නේ මත්ද්‍රව්‍ය නැවත නැවත වර්ධනය වී තිබීමයි. ඒ නිසා මේ ව්‍යසනය පරාජයට පත් කිරීමට නම් අනිවාර්යයෙන් ඒකාබද්ධ වැඩසටහනක් අවශ්‍ය බව අපි කල්පනා කළා. ඒ වෙනුවෙන් සියලු පාර්ශ්වයන් නියෝජනය වන මෙහෙයුම් කමිටුව අපි පත් කරනු ලැබුවා.

</p>

<p>

මේ වසර තුළ අපි කිහිපවරක් රැස්වෙලා විවිධ තීන්දු තීරණ ගනු ලැබුවා. ජාතික සභාව නියෝජනය කරන අපේ මහා සංඝරත්නය, පූජකතුමන්ලා එම අවස්ථාවට වැඩම කළා. ඒ නිසා සෑමවිටම අපේ හාමුදුරුවන් වහන්සේලාගේත්, පූජකතුමන්ලාගේත් සහාය අපිට ධෛර්යයක් වුණා. අපිට මෙම ව්‍යසනය පරාජය කළ හැකි වන්නේ එවැනි ඒකාබද්ධ වැඩසටහනක් මගින් පමණයි.

</p>

<p>

<span style="color:#dc2626">ඇත්තේ විකල්ප දෙකයි... ඔවුන්ට යට වී පරාජය වෙනවාද ?... ව්‍යසනය පරාජය කරනවා ද?</span>

</p>

<p>

අපි මේ රටේ ජනතාවට පොරොන්දුවක් ලබා දුන්නා මේ ව්‍යසනය අපේ රටින් මුළිනුපුටා දමනට බවට. ඒ වගේම අපි පියවරෙන් පියවර මේ විනාශකාරීත්වයේ දොරටුව විවෘත කළා. අපි එළියේ සිට බලනවාට විශාල ගැඹුරක් මෙහි තිබුණා. ඒ නිසා විශාල විනාශකාරීත්වයකින් පිරි තිබූ ගුහාවක දොරටු අපි විවෘත කර තිබෙනවා. එම දොරටු විවෘත කිරීම මගින් කලබලයට පත්වූ පිරිසක් සිටින බවත් අපි දන්නවා.

</p>

<p>

දැන් තෝරාගත යුතු මාවත් දෙකක් අපි හමුවේ තිබෙනවා. එක් මාවතක් වන්නේ මීට එරෙහි වන්නන්ට යටත්වී මෙම ගමන අතහැරීම. දෙවැනි මාවත වන්නේ කුමන බාධක මැද වුවද මෙම ව්‍යසනය පරාජයට පත් කිරිම සඳහා අප ගත් තීන්දුව සාර්ථකව ජයග්‍රහණයෙන් කෙළවර කිරීම. අපි ආණ්ඩුවක් ලෙස තෝරාගෙන තිබෙන්නේ මෙම දෙවන මාවතයි. සාර්ථක ලෙස මෙම ව්‍යසනය පරාජයට පත් කළ යුතුයි.

</p>

<p>

අද අපේ ජාතිය ජාතියක් ලෙස ගොදුරු වී තිබෙන ප්‍රධානතම ව්‍යසනය මෙයයි. එක් එක් සමාජ කණ්ඩායම්වලට තමන්ටම අනන්‍ය වූ ප්‍රශ්න තිබෙන බව මම දන්නවා. හැබැයි කිසිදු සමාජ භේදයකින් සහ සංස්කෘතික මෙන්ම භාෂාමය වෙනස්කමකින් තොරව අපි හැමදෙනාම ඉදිරියේ තිබෙන ජාතික ව්‍යසනය මෙම මත්ද්‍රව්‍ය උවදුරයි. මෙම මත්ද්‍රව්‍ය උවදුරින් අපි අපේ ජාතිය ගලවා ගත යුතුයි. ඒ නිසා අපි අපේ ගමන ඉදිරියටම ගෙන යා යුතුයි.

</p>

<p>

<span style="color:#dc2626">පසුගිය වසරේ දත්ත කියන කතාව</span>

</p>

<p>

පසුගිය වසරේ මෙහෙයුම්වලින් මත්ද්‍රව්‍ය විශාල ප්‍රමාණයක් අත්අඩංගුවට ගනු ලැබුවා.

</p>

<p>

අයිස් මත්ද්‍රව්‍ය සඳහා 2022 වසරේදී අවුරුදු 18ට වඩා අඩු තරුණයින්ගෙන් අත්අඩංගුවට ගෙන තිබුණේ ඒක තරුණයයි. හැබැයි 2025 වසර වන විට අපි 1874ක් අත්අඩංගුවට ගෙන තිබෙනවා. ඒ වගේම අවුරුදු 21 වැඩි තරුණයින් 11,737ක් අත්අඩංගුවට ගෙන තිබෙනවා. මෙම පිරිස ඇතුළේ අවුරුදු 21-18ත් අතර තරුණයින් 10,889ක් සිටිනවා. ඒ වගේම වයස අවුරුදු 18-14 අතර දරුවන් 1068ක් සිටිනවා. අවුරුදු 05-14ත් අතර වයසේ දරුවන් 13දෙනෙක් සිටිනවා. ඒ කියන්නේ අපේ ළමා ලපටින් පවා මෙහිදි ගොදුරු බවට පත්ව තිබෙනවා. ඒ වගේම ගැහැණු දරුවන් දෙසීය ගණනක් අත්අඩංගුවට පත්ව තිබෙනවා.

</p>

<p>

මේ ව්‍යසනය අපේ මුළු තරුණ පරම්පරාවම, අපේ අනාගතයම ව්‍යසනයට පත් කරමින් තිබෙනවා. රට සහ ජාතිය පිළිබද ආදරයක් සහ ඇල්ලමක්, තරුණ තරුණියන්ගේ අනාගතය පිළිබද බලාපොරොත්තුවක් තිබෙන අපිට මේ හමුවේ නිහඩව සිටීමේ හැකියාවක් නැහැ. අපි හමුවේ තිබෙන දේ වන්නේ මෙය පරාජය කිරීමයි.

</p>

<p>

මෙම ව්‍යසනයේ ප්‍රමාණය මේ සියලු දත්තවලින් පෙන්නුම් කරනවා. එපමණක් නොවෙයි, අපි මේ වසර තුළ විෂ මත්ද්‍රව්‍ය කිලෝග්‍රෑම් 15,282ක් අත්අඩංගුවට ගෙන තිබෙනවා. ඒ අනුව අයිස් කිලෝග්‍රෑම් 6,528ක්, හෙරෝයින් කිලෝග්‍රෑම් 4,000ක් අත්අඩංගුවට ගෙන තිබෙනවා. අද උදෑසනද හෙරෝයින් සහ අයිස් කිලෝග්‍රෑම් 150ක් අත්අඩංගුවට ගත්තා.

</p>

<p>

ඒ වගේම වෙනත් මත්ද්‍රව්‍ය කිලෝග්‍රෑම් 2,598ක්, හෂීස් කිලෝග්‍රෑම් 1,841ක්, කොකේන් කිලෝග්‍රෑම් 314ක්, මත්පෙති සහ කරල් මිලියන 4.5කට ආසන්න ප්‍රමාණයක් අත්අඩංගුවට ගෙන තිබෙනවා. අපි අත්අඩංගුවට ගත් මත්ද්‍රව්‍යවල මුළු වටිනාකම රුපියල් බිලියන 218ක් වෙනවා.

</p>

<p>

ගංජා ද එකතු කළ විට රුපියල් බිලියන 224ක් වෙනවා. එනම් රුපියල් කෝටි 21,800ක්. මේ වසරක මත්ද්‍රව්‍ය වෙළඳපොළ. අත්අඩංගුවට නොගත් ප්‍රමාණයද සලකා බැලූ විට කෙතරම් මහා පරිමාණ විනාශයක් සිදු වන්නේදැයි පැහැදිලි වෙනවා.

</p>

<p>

<span style="color:#dc2626">ජාලයේ බලය</span>

</p>

<p>

"මේ කෝටි 22,000ක මත්ද්‍රව්‍ය ජාවාරම හරහා විශාල ශක්තිමත් ජාලයක් නිර්මාණය වී තිබෙනවා. මෙම ජාලය බිඳනොදමා මත්ද්‍රව්‍ය අපගේ රටෙන් ඉවත් කරන්න බැහැ. මෙම මහා විශාල ධනස්කන්ධය නිසා රාජ්‍ය නිලධාරීන්, රේගු දෙපාර්තමේන්තුවේ සමහර අය, මෝටර් රථ ප්‍රවාහන දෙපාර්තමේන්තුවේ අය, ආගමන විගමන නිලධාරීන්, පොලිසියේ සමහර නිලධාරීන් මෙන්ම ව්‍යාපාරිකයන් සහ දේශපාලඥයන් පවා මිලදී ගැනීමට මත්ද්‍රව්‍ය ජාවාරම්කරුවන්ට හැකි වී තිබෙනවා.

</p>

<p>

පසුගිය කාලයේ ප්‍රධාන කුඩු ජාවාරම්කරුවන් පළාත් පාලන ආයතනවල සභාපති ධූරවලට සහ නියෝජිතයන් බවට පවා පත් වීමේ හැකියාව ලබා ගත්තා. මෙම මත්ද්‍රව්‍යයෙන් උපයා ගන්න මහාධනස්කන්ධය සමග දේශපාලන ව්‍යාපාර ගොඩනැගීමට පටන් ගත්තා.

</p>

<p>

අද මෙම ව්‍යසනය මුළු සමාජයම ගිලගනිමින් තිබෙනවා. තවදුරටත් ගරු කටයුතු කිසිදු ස්ථානයක් ඉතිරි වන්නේ නැහැ. වැඳ නමස්කාරයට සහ ගෞරවයට බඳුන්වන ආගමික සංස්ථාවන් තුළට මේ ව්‍යසනය ගලායමින් තිබෙනවා. වසර දෙදහස් ගණනක් මුළුල්ලේ ජන සමාජය ගොඩනැගීමේදී දෙපා ගෙවෙනකම් ගම් නියම්ගම් කරා වැඩම කළ අපේ මහා සංඝරත්න සහ සංඝ සමාජය වෙතත් අඩුවැඩි වශයෙන් මෙය ගලාගෙන ගොස් තිබෙනවා. අනෙකුත් ආගමික සංස්ථාවන් වෙතද මෙය ව්‍යාප්ත වී තිබෙනවා. පොලිසිය, ත්‍රිවිධ හමුදාව, රාජ්‍ය ආයතන මේ සියල්ල මීට ගොදුරු වී තිබෙනවා.

</p>

<p>

අපට මතුපිටින් පෙනෙන රාජ්‍ය යන්ත්‍රණය වෙනුවට අභ්‍යන්තරයෙන් ක්‍රියාත්මක වන කළු රාජ්‍ය යන්ත්‍රණයක්' නිර්මාණය වී තිබෙනවා. මෙය තවදුරටත් වර්ධනය වුණොත් ගෞරවයට පාත්‍ර වුණු සමාජය බලාපොරොත්තුවලින් ඉන්න සමාජය විධිමත්භාවයට ගේන මේ සියලු යාන්ත්‍රණ තවදුරටත් වළංගු නැති යාන්ත්‍රණ බවට පත් වෙනවා. ඔවුන් උපයාගන්නා මහා කළු ධනයෙන් ඔවුන්ට හැකියාව ලැබෙනවා මේ සියල්ල තමන්ගේ අතට ගන්න. එහෙනම් මා කියනවා නැවතත් අපිට පාරවල් දෙකක් තියෙනවා.

</p>

<p>

ඒගොල්ලෝ ඒගොල්ලන්ගේ කළු රාජ්‍යයේ ඉන්න, අපි අපිට පැවරී තිබෙන රාජ්‍යයේ වැඩ කරගෙන ඉන්නවා. එහෙම තමයි ගොඩක් අය හිටියේ. හැබැයි අපි ආණ්ඩුවක් හැටියට තීරණය අරන් තිබෙනවා, අප මේ කළු රාජ්‍යය පරාජයට පත් කරනවා, මේක බිඳ වට්ටනවා. මත්ද්‍රව්‍ය හා බැඳුනු කළු රාජ්‍යය බිඳ වැට්ටීමකින් තොරව අපේ දරුවන්ට විශ්වාසවන්ත අනාගතයක් නැහැ.

</p>

<p>

<span style="color:#dc2626">රටම එකට වැඩ සටහන තුළ දියත් කළ සටන</span>

</p>

<p>

තමන්ගේ දරුවන්ට හොඳ අනාගතයක් වෙනුවෙන් "වෙහෙස වෙන දෙමව්පියන් ඉන්න රටක, දෙමව්පියන්ගේ ඇස් ඉදිරිපිට දැන් තිබෙනවා ඒ දරුවන්ට විශ්වාසවන්ත අනාගතයක් තිබෙනවද? කියන කාරණය. මම දන්නවා දෙමව්පියන් විශාල ප්‍රමාණයකින් මේ ඇතිවී තිබෙන ව්‍යසනය හමුවේ අසරණභාවයට පත් වෙලා තිබෙනවා. මුළු සමාජයකම මේ ව්‍යසනය මහා රාක්ෂයෙකු ලෙස පැතිරෙමින් තිබෙනවා. ඒ හා බැඳුනු මත්ද්‍රව්‍ය ජාලයත්, ඒ හා බැඳුණු අපරාධ යාන්ත්‍රණයත් බිඳ වැට්ටිය යුතුයි. අපි 'රටම එකට' වැඩසටහන ඇතුළේ එම අපරාධ රාජ්‍යය බිඳ වැට්ටීම සඳහා සැලසුම් සකස් කළා. ඒ අනුව මේ මත්ද්‍රව්‍ය ජාලය හා බැඳුණු සංවිධානාත්මක අපරාධකරුවන් ලංකාව තුළ අත්අඩංගුවට ගන්නත්, ලංකාවෙන් බැහැරව ගියපු අයත් අපිට ගෙන්වා ගැනීමටත් හැකියාව ලැබුණා.

</p>

<p>

"මේ වසර ඇතුළත විවිධ නාමයන්ගෙන් පටබැඳුණු අය, විවිධ ගම් නගර බියපත් කරගෙන හිටපු අය අපි අත්අඩංගුවට ගත්තා. පිටරට හිටපු 67 දෙනෙක් අපි ලංකාවට ගෙන්නුවා. තවත් අපි ඉදිරියේදී ලෝකයේ කොහේ සැඟවිලා සිටියත්, අපේ රටේ මත්ද්‍රව්‍ය වෙළඳාම නිසා සංවිධානාත්මක අපරාධවල යෙදෙනවා නම්, ලෝකයේ කොතනක හිටියත් ඔවුන්ට අපි කියනවා 'ඔබ අනාරක්ෂිතයි, කොහේ හිටියත් කියලා. ඒ වගේම අපි 112 දෙනෙකුට රතු නිවේදන නිකුත් කරලා තියෙනවා, ඔවුන්ගේ මිලියන 4500ක දේපල තහනම් කර තිබෙනවා.

</p>

<p>

"මත්ද්‍රව්‍ය හරහා උපයාගන්නා ලද දේපළ මිලියන 4500ක දේපළ අපි අත්හිටුවාගෙන තිබෙනවා. මේ අවුරුද්ද ඇතුළත T56 ස්වයංක්‍රීය ගිනිඅවි 97ක් අත්අඩංගුවට ගෙන තිබෙනවා. සමහර විට පොලිසියකටත් එච්චර ප්‍රමාණයක් අවි නැහැ, මේ ගිනිඅවි සමහර ඒවා අපේ හමුදාවලින් එළියට ඇවිල්ලා තියෙනවා, ඒවා අපිට ඔඩිට් වාර්තාවලින් එළිදරව් වී තිබෙනවා. මේ ගිනිඅවි සමහර අවස්ථාවල අපිට වාර්තා වුණා පොලිස් නිලධාරී මහත්තයෙක් ගිනිඅවිය විකුණලා පැනලා යනවා. ගිනිඅවි එළියට ඇවිල්ලා තිබුණා. පිස්තෝල 143ක්, ඒකේ 47 අවියක්, රිවෝල්වර 105ක්. මේක තමයි අපරාධ රාජ්‍යය සතුව තිබෙන ගිනිඅවි ප්‍රමාණය. තවත් තියෙනවා කියලා අපි විශ්වාස කරනවා.

</p>

<p>

<span style="color:#dc2626">පොලිසියේ හා ත්‍රිවිධ හමුදාවේ කැපවීම</span>

</p>

<p>

මෙවැනි ගිනිඅවි ප්‍රමාණයක් අපරාධකරුවන් අත ගැවසෙද්දි මේ සමාජය ආරක්ෂිතද? අපේ දරුවන් ආරක්ෂිතද? අපේ දරුවන් මේ සමාජයේ ආරක්ෂිත නැහැ. මේ තරම් ගිනිඅවි ප්‍රමාණයක් නිදැල්ලේ සැරිසරනවා, තව අත්අඩංගුවට ගත යුතුයි. අපි ඒ පිළිබඳව සැලසුම් සකස් කරලා තිබෙනවා. ඒ නිසා මේ මත්ද්‍රව්‍ය ජාලය මැඩපැවැත්වීම සඳහා අපි විශාල මෙහෙයුමක් කරමින් සිටිනවා.

</p>

<p>

"විශේෂයෙන් පොලිස්පතිතුමා ඇතුළු පොලිස් දෙපාර්තමේන්තුවත්, ඒ වගේම නාවික හමුදාපතිතුමා, ගුවන් හමුදාපතිතුමා, අපේ යුධ හමුදාපතිතුමා ඇතුළු හමුදා යාන්ත්‍රණය මේ මෙහෙයුමේදී, මේ අත්අඩංගුවට ගැනීමේදී, මේ ව්‍යසනය පරාජයට පත් කිරීමේදී විශාල වෙහෙසක් දරමින් තිබෙනවා. ඒ ආයතන මේ රාජ්‍යය බේරාගැනීම වෙනුවෙන්, අපේ දරුවන් බේරාගැනීම වෙනුවෙන් විශාල මෙහෙයුමක නිරත වෙලා තිබෙනවා. හැබැයි ඒ මෙහෙයුම් පිළිබඳ ඇගයීමක් නැතුව, එක්කෝ නිලධාරියෙකුගේ යම් අතපසුවීමක් වුණොත් ඒක පුවත්පතේ සිරස්තලය බවට පත්වෙනවා, ඒක මාධ්‍ය ආයතනයේ ප්‍රධානම ටීවී වැඩසටහන බවට පත්වෙනවා.

</p>

<p>

මෙවැනි කෝටි 22,000කට ආසන්න මත්ද්‍රව්‍ය ප්‍රමාණයක් අත්අඩංගුවට ගන්නකොට, ගිනිඅවි තොග විශාල ප්‍රමාණයක් අත්අඩංගුවට ගන්න කැපවුණේ කවුද? මේ පොලිසිය, මේ ත්‍රිවිධ හමුදාව. ඒ නිසා මෙම මෙහෙයුමේදී ඔවුන් විසින් කරන ලද කාර්යයට නිසි ඇගයීමක් අපේ රජය විසින් ලබාදෙනවා. ඒ වගේම පසුගිය කාලයේ මෙහෙයුම්වලට සම්බන්ධ වුණු බොහෝ නිලධාරීන්ට අපි ප්‍රසාද දීමනාවන්, දිරි දීමනාවන් ලබාදීමට කටයුතු කළා, තවත් ඉදිරියේදී අපි ඒ පිළිබඳ සැලකිල්ලට භාජනය කරනවා.

</p>

<p>

<span style="color:#dc2626">පුනරුත්ථාපන වගකීම </span>

</p>

<p>

"මෙහෙයුම්වලට පොලිසියේ සහ ත්‍රිවිධ හමුදාවේ සහය ඉතාමත් අවශ්‍යයි. හැබැයි මේ අත්අඩංගුවට ගැනීම පමණක් නොවෙයි, අපිට පුනරුත්ථාපනය කිරීම සඳහා වැඩසටහනක් අවශ්‍යයි. අපි පුනරුත්ථාපන මධ්‍යස්ථාන මඩකලපුව, අකුරස්ස, නිට්ටඹුව, මහනුවර ආදී පළාත්වල අලුතෙන් පිහිටුවනු ලැබුවා. පවතින පුනරුත්ථාපන මධ්‍යස්ථාන කන්දකාඩු, සේනපුර, වවුනියාව ආදී ප්‍රදේශවල තිබෙන පුනරුත්ථාපන මධ්‍යස්ථා වැඩ දියුණු කළා.

</p>

<p>

ඒ වගේම අපි සැලසුම් කරලා තිබෙනවා රාජ්‍ය අනුග්‍රහය මුළුමනින්ම ලබන පුනරුත්ථාපන මධ්‍යස්ථාන පමණක් නෙවෙයි , පන්සල්, අපේ ආගමික පූජකතුමන්ලා, සිවිල් සංවිධාන විසින් පුනරුත්ථාපන මධ්‍යස්ථාන ගණනාවක් පවත්වාගෙන යනවා. අන්න ඒ පුනරුත්ථාපන මධ්‍යස්ථාන සඳහා රජයේ උපරිම සහය ලබාදෙන්න අපි ලෑස්තියි. අපි ඔවුන් සමඟ වැඩ කරමින් ඔවුන්ට අවශ්‍ය සහය ලබාදෙන්න සූදානම්.

</p>

<p>

ඒ වගේම අපේ සෞඛ්‍ය දෙපාර්තමේන්තුව සහ අදාළ ආයතන විශාල ප්‍රමාණයක් මැදිහත් වෙලා, රට පුරා වළක්වාගැනීමේ ප්‍රජා දැනුවත් කිරීමේ වැඩසටහන් 2,59,000ක් සංවිධානය කරලා තිබෙනවා. එම වැඩසටහන් විශාල ප්‍රමාණයක් අපි කරලා තිබෙනවා, ජනතාව සහ දරුවන් දැනුවත් කිරීම සඳහා වැඩසටහන් පවත්වා තිබෙනවා.

</p>

<p>

<span style="color:#dc2626">සියලුම දේ කරන්නේ නීතියට යටත්ව </span>

</p>

<p>

අපි මෙය මර්ධනය කළ යුත්තේ අපිට තිබෙන නීති රාමුව තුළයි. අපි කිසිසේත්ම මෙම ව්‍යසනය පරාජයට පත් කිරීමේ ක්‍රියාදාමයේදී නීති රාමුවෙන් එළියට එන්න අපේක්ෂා කරන්නේ නැහැ. අපිට සකස් කරලා තිබෙනවා නීතියක්, ඒ නීතිය යටතේ තමයි අපි වැඩ කරන්නේ.

</p>

<p>

අපිට නීතිය ප්‍රමාණවත් නැත්නම් අපි නීතිය හදනවා. අත්අඩංගුවට ගත් මත්ද්‍රව්‍ය විනාශ කිරීම පිළිබඳ ප්‍රධාන ප්‍රශ්නයක් තිබුණා. බොහෝ සමාජයේ සැකයක් තිබුණා - මේ අත්අඩංගුවට ගන්නා ලද මත්ද්‍රව්‍ය මෙච්චර තොග අත්අඩංගුවට ගන්නවා පේනවා, හැබැයි මේවා ආපසු වෙළඳපොළට එනවාද කියන සැකය තිබුණා

</p>

<p>

අපේ තිබුණ නීති රාමුව ඇතුළේ උසාවියකින් ගොනු කරන ලද නඩුව අවසන් වෙලා, ඒ නඩුවට අදාළ භාණ්ඩය විනාශ කරන්න කියලා උසාවියෙන් නියෝගයක් එනතෙක් අපිට විනාශ කරන්න බලයක් නැහැ. නමුත් අපි විනාශ කිරීම සඳහා අවශ්‍ය නීති සම්පාදනය කළා.

</p>

<p>

ඊළඟට මත්ද්‍රව්‍යවලින් උපයාගන්නා ලද ධනය, ඒ කියන්නේ අයුතු ලෙස උපයාගත් ධනය සහ වත්කම් පවරාගැනීමේ නීතියක් තිබුණේ නැහැ. "ඒ නිසා අපි 2025 වසරේ අයුතු ලෙස උපයාගත් දේපල පවරාගැනීමේ නීතිය සම්මත කළා. අන්න ඒ පවරාගැනීමේ නීතිය ඇතුළේ තමයි කෝටි 4500ක දේපල මේ වෙනකොට අපරාධකරුවන්ගෙන් පවරාගෙන තියෙන්නේ. ඒ නීතිය තිබුණේ නැත්නම් අපිට පවරාගැනීමේ අවස්ථාවක් නැහැ.

</p>

<p>

<span style="color:#dc2626">සංවිධානාත්මක අපරාධ පනත කියන තරම් බිහිසුණු ද?</span>

</p>

<p>

විශේෂයෙන්ම දැන් සාකච්ඡාවට බඳුන් වෙන සංවිධානාත්මක අපරාධ පනත. අපි අද සංවිධානාත්මක අපරාධකරුවන්ට නීතිය ක්‍රියාත්මක කරන්නේ ත්‍රස්තවාදය වැළැක්වීමේ පනත යටතේ. මේක තමයි ඇත්ත. එක් සංවිධානාත්මක අපරාධකරුවෙක් අත්අඩංගුවෙන් පැනයන්න උත්සාහ කරනවා. අත්අඩංගුවෙන් පැනයාමට උත්සාහ කිරීම අපි නීතියට ගේන්න හදනවා ත්‍රස්තවාදය වැළැක්වීමේ පනත යටතේ. හැබැයි ක්‍රියාව මොකක්ද? සංවිධානාත්මක අපරාධකරුවෙක් අත්අඩංගුවෙන් පැනයෑමට උත්සාහ කිරීම. දැනට තියෙන නීතිය අනුව නඩු ගොනු කිරීම සිදුවුණේ ත්‍රස්තවාදය වැළැක්වීමේ පනත යටතේ තමයි පරීක්ෂණ කරන්න සිදුවුණේ. වෙන කරන්න දෙයක් නැති නිසා ත්‍රස්තවාදය වැළැක්වීමේ පනතේ නඩු ගොනු කරන්න උත්සාහ කළා

</p>

<p>

අපේ අභිප්‍රායක් තියෙනවා පීටීඒ එක (ත්‍රස්තවාදය වැළැක්වීමේ පනත) විශාල ප්‍රමාණයකින් දුර්වල කරන්න ඕනේ. මොකද අපිට දැන් එදිනෙදා මුහුණදෙන්න ත්‍රස්තවාදී කටයුත්තක් නැහැ. ඒක ඉතාමත් දුර්වල පනතක් බවට පත්කරනවා. සංවාදය තිබෙනවා. අපි කථා කරනවා. හැබැයි අපිට සංවිධානාත්මක අපරාධ වැළැක්වීම සඳහා ශක්තිමත් නීතියක් අවශ්‍යයි. මේක තමයි මේ යුගයේ ජාතිය ව්‍යසනයෙන් මුදවාගැනීම සඳහා අවශ්‍ය නීතිය.

</p>

<p>

නීතිය හැමවෙලාවෙම අලුත් වෙනවා. අලුත් අභියෝගයන්ට අනුව අලුත් නීති හැදෙනවා. කාලයක් පරිසර නීති තිබුණේ නැහැ. හැබැයි පරිසරයට විශාල ලෙස හානි වෙනකොට පරිසර ආරක්ෂණය කිරීම සඳහා නීති සම්පාදනය වෙනවා. "කාලයක් මුදල් විශුද්ධිකරණ නීති තිබුණේ නැහැ. හැබැයි කළු සල්ලි උපයාගැනීම විශාල තර්ජනයක් බවට පත්වෙනකොට මුදල් විශුද්ධිකරණ පනත ඇති වෙනවා. කාලයක් පොදු දේපල විනාශ කළේ නැහැ පාලකයෝ. හැබැයි පාලකයෝ පොදු දේපල විනාශ කරනකොට පොදු දේපල ආරක්ෂා කරගැනීම සඳහා පොදු දේපල පනත සකස් වෙනවා.

</p>

<p>

දැන් සංවිධානාත්මක අපරාධ වර්ධනය වෙලා තිබෙනවා. ඒ නිසා සංවිධානාත්මක අපරාධ වැළැක්වීමේ පනතක් මෙම යුගයට අවශ්‍ය වී තිබෙනවා.නීතිය සර්වකාලීන නැහැ. අද හදන නීතිය චිරාත් කාලයක් පවතින්නේ නැහැ. සමාජයේ අලුත් අභියෝග එනවා. සමාජයේ අලුත් අභියෝග එනකොට ඒ අභියෝගයන්ට මුහුණදීම සඳහා ශක්තිමත් නීති අවශ්‍යයි.

</p>

<p>

අපි මේ වැඩසටහන ආරම්භයේදීම කිව්වා - මීට අවුරුද්දකට කලින් කිව්වා - මේ අයට දඬුවම් දීම සඳහා තිබෙන නීති ප්‍රමාණවත් නැත්නම් නව නීති සකස් කරනවා කියලා. ඒකට තමයි ආණ්ඩුව තියෙන්නේ. ඒ නීති පුරවැසියන්ට හදන්න බැහැ. ඒ නීති සාමාන්‍ය කෙනෙකුට හදන්න බැහැ, ග්‍රාම නිලධාරී මහත්මයාට ඒ නීතිය හදන්න බැහැ."ඒ නීතිය හදන්න ඕනේ පාර්ලිමේන්තුවට මිසක් වෙන කොතනටවත් බලයක් නැහැ.

</p>

<p>

<figure style="margin:1.5rem 0;text-align:center"><img src="https://scontent.fcmb2-2.fna.fbcdn.net/v/t39.99422-6/888788784_2365035117585380_791523527546044342_n.png?stp=dst-jpg_tt6&cstp=mx2048x1365&ctp=s2048x1365&_nc_cat=111&_nc_map=urlgen_bucketless&ccb=1-7&_nc_sid=f727a1&_nc_ohc=cSKn_-J4lTkQ7kNvwHSpH_h&_nc_oc=AdqZ9DzqS-8zTXHuQSFK9NS37Q1wRGndflgPQAHq4xUGBh0UMefK44XysUW-q6W8v8I&_nc_zt=14&_nc_ht=scontent.fcmb2-2.fna&_nc_gid=BQpqVnj9klrg_GZlkLsECg&_nc_ss=7a2a8&oh=00_AQQmjSvwB1A871pAVKWX5AtWPLWKm_byYDCgaYzirgw1HA&oe=6AF27B42" alt="" style="max-width:100%;border-radius:6px" /><figcaption style="font-size:0.85em;color:#6b7280;margin-top:0.4rem"></figcaption></figure>

<span style="color:#dc2626">සාධාරණ සංවාදයක් තුළ අලුත් පනත සංශොධනයට ලෑස්තියි...

</span>

</p>

<p>

ත්‍රස්තවාදය වැළැක්වීමේ පනත තමයි මේ සංවිධානාත්මක අපරාධකරුවන් සඳහා යොදවගත්තේ. ඒක ගත්තොත් පුද්ගලයන් හැටියට අපි දීර්ඝ කාලයක් ත්‍රස්තවාදය වැළැක්වීමේ පනතට විරුද්ධ වුණු අය, ත්‍රස්තවාදය වැළැක්වීමේ පනතින් බැට කාපු අය. ඒ නිසා එවැනි නීතියක් අවශ්‍ය නැති බව පිළිගන්නවා. ඒ නිසා තමයි ඒ පනත අපි සංශෝධනය කරන්නේ - කලින්ට වඩා දුර්වල කරලා නව පනතක් ගේනවා. හැබැයි අද අපිට සංවිධානාත්මක අපරාධ වැළැක්වීම සඳහා ශක්තිමත් නීතියක් අවශ්‍යයි. දැන් අපි නීතිය පාර්ලිමේන්තුවට ඉදිරිපත් කරලා තිබෙනවා.

</p>

<p>

මේ නීතියට විරුද්ධ වෙන කණ්ඩායම් දෙකක් ඉන්නවා. එකක් හරි පැහැදිලියි - සංවිධානාත්මක අපරාධකරුවන්ගෙන් ඒ වරප්‍රසාද සහ ආරක්ෂාව ලබන කණ්ඩායම්. ඒක අපි ගණන් ගන්නේ නැහැ, හැබැයි තව කණ්ඩායමක් ඉන්නවා - අපේ රටේ ප්‍රජාතන්ත්‍රවාදය, මිනිසුන්ගේ මූලික අයිතිවාසිකම් පිළිබඳ කතාකරන කණ්ඩායම්. අපි ඒ කණ්ඩායම එක්ක සාකච්ඡා කරන්න ලෑස්තියි.

</p>

<p>

කිසිසේත්ම ජනතාව මර්ධනය කරන්න, ජනතාවගේ අයිතිවාසිකම් නැති කිරීමේ අවශ්‍යතාවයක් නෙමෙයි අපිට තියෙන්නේ. සංවිධානාත්මක අපරාධ මැඩපැවැත්වීම සඳහා නීතියක් අවශ්‍යයි, ඒ නීති හදන එකට අපි ලෑස්තියි. දැනට ශ්‍රේෂ්ඨාධිකරණයේ පනත තියෙනවා, ශ්‍රේෂ්ඨාධිකරණයේ පනත සාකච්ඡාවට බඳුන් වෙන්න තිබෙනවා. දැනට ඒ පනතට විරුද්ධව අධිකරණයට ගියපු අය මූලික වශයෙන් කරුණු තුනක් මතු කරලා තිබෙනවා.

</p>

<p>

එකක් - රඳවාගැනීමේ කාලය, මේ පනත ඇතුළේ රඳවාගැනීමේ කාලය පැය 72යි. ඒක වැඩියි කියලා යෝජනාවක් තිබෙනවා. සංවාදයක් තියෙනවා අපේ ශ්‍රේෂ්ඨාධිකරණයේ. අපි ලෑස්තියි ඒක සංශෝධනය කරන්න - පැය 72ක කාලය පැය 48 දක්වා අඩු කරනවා. අපි සවන්දෙන්න ලෑස්තියි.

</p>

<p>

ඊළඟට ජාත්‍යන්තර වශයෙන් සකස් වුණු පච්ච කොටපු සංවිධානාත්මක කල්ලි, එය හඳුනාගන්න ලෝකයේ ප්‍රවණතාවයක් තියෙනවා, ඒ සඳහා වූ නීතිය අපේ රටේ නැත්නම්, දැනට අපිට ඒ නීතිය අවශ්‍ය නැත්නම් අපි ඒක අයින් කරන්න ලෑස්තියි.

</p>

<p>

තව නීතියක් තිබෙනවා "සුරාබදු ආඥා පනත යටතේ කෙරෙන වරදවල්වලට සංවිධානාත්මක අපරාධ පනත යටතේ කරන්න පුළුවන් කියලා. අපි සුරාබදු ආඥා පනත යටතේ වන වරදවල් සංවිධානාත්මක අපරාධ පනත යටතේ කරන්නේ නැහැ කියලා ඒකත් අයින් කරගන්නවා. ප්‍රශ්නයක් නැහැ.

</p>

<p>

ඕක තමයි දැනට ශ්‍රේෂ්ඨාධිකරණයේ සාකච්ඡාවට බඳුන් වෙලා තියෙන පනතේ ප්‍රධාන කරුණු තුන. තව තියෙනවා නම් අපි ලෑස්තියි.

</p>

<p>

මේක කිසිසේත්ම මට හෝ ආණ්ඩුවට හෝ අපේ පොලිසියට, අපේ දෙපාර්තමේන්තුවලට අනිසි බලයක් ලබාගැනීම නෙමෙයි. හැමදාමත් කාටවත් චිරාත් කාලයක් බලය ලැබෙන්නේ නැහැ. අපි හැමවෙලාවෙම බලය හොබවනකොට බලය අත්හරින්න පුළුවන් මනෝභාවයකින්. බලය හොබවනකොට හැමවෙලාවෙම අපි සම්පාදනය කරන නීති පිළිබඳ කල්පනා කරන්න ඕනේ - බලය නොමැති වෙලාවේ මේ නීති කවරක්ද කියලා.

</p>

<p>

අපි කිසිසේත්ම බලය දීර්ඝකාලීනව පවත්වාගැනීම වෙනුවෙන් හෝ බලය අත්හරින්නේ නැහැ කියන මනෝභාවයකින් වැඩ කරන්නේ නැහැ. අපි වැඩ කරන්නේ - ජනතාව අපිට බලයක් දීලා තියෙනවා, ඒ බලය ඕනෑම මොහොතක ජනතාවට යළි කැඳවන්න පුළුවන්... මැතිවරණයකින් කැඳවන්න පුළුවන්. බලය ක්‍රියාත්මක කිරීම සඳහා මම, මගේ දරුවන්, මගේ ඥාතීන් ඉන්නවා... එහෙම එකක් අපිට නැහැ. ඒ නිසා අපි නීති සංශෝධනය කරන්න ලෑස්තියි.

</p>

<p>

හැබැයි පළමු සංවාදයෙන් අපි බේරාගන්න ඕනේ. සංවිධානාත්මක අපරාධ වැළැක්වීමේ පනතක් අවශ්‍යද නැද්ද? මම හිතනවා එතකොට සංවිධානාත්මක අපරාධකරුවන්ගෙන් ආරක්ෂාව හෝ වරප්‍රසාද ලබන කට්ටිය හැර අනිත් ඔක්කොම 'ඔව්' කියනවා. ඊළඟ ප්‍රශ්නය එනවා ඒ පනතේ හදලා තියෙන එක වැඩිද අඩුද? ඒක අපි කතා කරමු. ඒ නිසයි දැනටමත් අපි සංශෝධන තුනක් පිළිබඳ එකඟතාවය ශ්‍රේෂ්ඨාධිකරණයට ප්‍රකාශ කරන්න බලාපොරොත්තු වෙන්නේ.

</p>

<p>

<span style="color:#dc2626">නීතිය විතරක් ප්‍රමාණවත් නෑ

</span>

</p>

<p>

හැබැයි නීතිය විතරක් ප්‍රමාණවත් නැහැ. අවසානයේදී සංවිධානාත්මක අපරාධකරුවෙක්, මත්ද්‍රව්‍ය ජාවාරම්කරුවෙක් අත්අඩංගුවට ගත්තට පස්සේ නීතිය ඉදිරියට ගිහිල්ලා දඬුවම් දෙන්න ඕනේ. අපි රජයක් හැටියට නීතියෙන් පිටත දඬුවම් දීමේ ප්‍රතිපත්තියක නැහැ. ඉතිහාසයේ එහෙම තිබුණා. අපි කිසිසේත්ම නීතියෙන් පිටත මොවුන්ට දඬුවම් දෙන්නේ නැහැ. ඒකට නීතියක් ඕනේ, ඒ නීතිය අනුව නඩු අහලා දඬුවම ලැබෙන්න ඕනේ.

</p>

<p>

"හැබැයි නඩුව ඇසීමේ කාලය දීර්ඝ ලෙස ඇදෙනවා. එහෙම කරන්න බැහැ. ඒ නිසා ඒ ආයතන ශක්තිමත් කරන්න ඕනේ. පරීක්ෂණ කරන ආයතන ශක්තිමත් කරන්න ඕනේ, නඩු ගොනු කරන නීතිපති දෙපාර්තමේන්තුව ශක්තිමත් කරන්න ඕනේ, ඒ නඩුවලට අවශ්‍ය වන පර්යේෂණ සාක්ෂි ඉදිරිපත් කරන රසපරීක්ෂක දෙපාර්තමේන්තුව ශක්තිමත් කරන්න ඕනේ, ඒ නඩු අවසාන වශයෙන් අධිකරණයේ විභාගයට ලක් කරන්න අධිකරණ ක්ෂේත්‍රය ශක්තිමත් කරන්න ඕනේ. අපි මේ ඔක්කොටම මැදිහත් වෙලා තිබෙන්නේ.

</p>

<p>

පරීක්ෂණ කරන ආයතන, පොලිසිය හදාගන්න, ඔවුන්ට විශේෂ පුහුණුවක් දෙන්න අපි සැලසුම් කරලා තිබෙනවා. පරීක්ෂණ මත නඩුකර ගොනු කරන්න ඕනේ. ඒකට නීතිපති දෙපාර්තමේන්තුව ශක්තිමත් කරන්න ඕනේ. ඒ සඳහා විශේෂයෙන්ම අපිට රසපරීක්ෂක වාර්තා අවශ්‍යයි. 36,000ක් වාර්තා ගොඩගැහිලා තිබුණා. සාමාන්‍යයෙන් මාසෙකට අවසන් කරේ 3,000ක් වගේ ප්‍රමාණයක්. අපි අලුතෙන් කාර්ය මණ්ඩලය යෙදෙව්වා, අලුතෙන් දීමනා දුන්නා, සමහර යටිතල පහසුකම් සඳහා අපේ නාවික හමුදාවේ සහාය ලබා දුන්නා. "දැන් ආසන්න වශයෙන් මාසෙකට 3,000ක් අවසන් කරපු රසපරීක්ෂක වාර්තා ප්‍රමාණය දැන් 9,000 දක්වා අපි වැඩි කරලා තියෙනවා. අපිට 36,000ක් ගොඩගැහිලා තිබුණා, මේ 36,000 අපිට දැන් මාස දෙකක් ගිහිල්ලා තියෙනවා නම් තව මාස දෙකකින් අවසන් කරන්න පුළුවන්. එහෙනම් රසපරීක්ෂක වාර්තා අවසන් වුණාම මහේස්ත්‍රාත් අධිකරණයට කරුණු වාර්තා කරලා ඊට පසුව මහා අධිකරණවල නඩු ගොනු කරන්න පුළුවන්.

</p>

<p>

ඊට පස්සේ මහා අධිකරණ අපි අලුතෙන් පිහිටුවලා තිබෙනවා. කොළඹ අලුතෙන් මහා අධිකරණ හතරක් පහක් වගේ ප්‍රමාණයක් පිහිටෙව්වා අලුතෙන්. අපි මහා අධිකරණ ප්‍රමාණය වැඩි කරා 22 වෙනි සංශෝධනයෙන්. අලුතෙන් මහා අධිකරණ හදන්න ඕනේ, හැබැයි මහා අධිකරණවලට පත්කරන්න ඕනේ විනිසුරුවන්. අපි විනිසුරුවන් ප්‍රමාණය වැඩි කළා. දඬුවම් දීම සඳහා අවශ්‍ය යාන්ත්‍රණය අපි සකස් කරලා තිබෙනවා.

</p>

<p>

ඒ නිසා අපේ රජයේ ප්‍රමුඛතාවයක් සහිත කාර්යයක් ලෙස සලකා, විශේෂයෙන්ම මේ මත්ද්‍රව්‍ය හා සම්බන්ධ සන්නද්ධ අපරාධ කල්ලි මැඩපැවැත්වීම සඳහා කටයුතු කරමින් තිබෙනවා. දැන් අපිට තියෙන ප්‍රශ්නය මොකක්ද? ඒ කාර්යය විතරක් ප්‍රමාණවත් නැහැ.

</p>

<p>

<span style="color:#dc2626">ජනතා සහාය අවශ්‍යයයි.</span>

</p>

<p>

ගොඩනැගිල්ලක් කඩලා අලුත් ගොඩනැගිල්ලක් හදන්න අපිට ඉංජිනේරුවන්, සැලසුම් ශිල්පීන්, කම්කරුවන්, අමුද්‍රව්‍ය තිබුණාම ප්‍රමාණවත් - ඒක පොඩි ටීම් එකක වැඩක්. එහෙත් මහා ජලාශයක් හදන එක කණ්ඩායමක් කරපු වැඩක්. හැබැයි මේ ව්‍යසනය, මේ ව්‍යසනය පරාජයට පත් කිරීමට ජනතාවගේ සහය අවශ්‍යයි. තමන්ගේ දරුවෙක් ගොදුරු වෙලා ඉන්නවද, තමන්ගේ ස්වාමියා ගොදුරු වෙමින් තිබෙනවද, තමන්ගේ ස්වාමියාගේ, දරුවාගේ වෙනත් ගති ලක්ෂණ නිර්මාණය වෙමින් තිබෙනවද, තමන්ගේ දරුවා පාතාලයේ සාමාජිකයෙක් බවට පත්වෙමින් තිබෙනවද, තමන්ගේ දරුවා මෙම ව්‍යසනයේ කොටස්කරුවෙක් බවට පත්වෙමින් තිබෙනවද කියලා තමන්ට, තමන්ගේ දරුවා ගැන හොඳ විශ්ලේෂණයක් තියෙනවා.

</p>

<p>

පොලිස් නිලධාරියා අත්අඩංගුවට ගන්න කලින් දෙමව්පියන් දන්නවා ඔහු මත්ද්‍රව්‍ය ලෝලියෙක්, ඔහු මත්ද්‍රව්‍ය ජාවාරම්කාරයෙක් කියලා. දන්නේ නැද්ද? දෙමව්පියන් සහ දරුවන් අතර තියෙන සම්බන්ධය නිසා දෙමව්පියන්ට හොරෙන් මේක වෙන්න තියෙන ඉඩකඩ බොහෝම අඩුයි. ඒ නිසා මේ ව්‍යසනයේදී විශාල කාර්යභාරයක් අපේ දෙමව්පියන්ට තියෙනවා. විශේෂයෙන්ම අපි අධ්‍යාපන අමාත්‍යාංශය හරහා වැඩසටහනක් හදනවා - දරුවන්ට නෙමෙයි, දෙමව්පියන් වෙත මේ වැඩසටහන ගෙනියන්න.

</p>

<p>

"මොකක්ද වෙන්නේ දෙමව්පියන්ට තමන්ගේ දරුවන්ගේ අනාගතය විනාශ වීම ගැන කියන්න ඕනේ අපි. මොකක්ද මේ මත්ද්‍රව්‍යවලට ඇබ්බැහි වුණාම සිදුවෙන්නේ? මනස වියවුල් වෙනවා, ශරීරය කෘශ වෙනවා, ආත්මගෞරවය නැතුව යනවා, පෞරුෂය කඩාවැටෙනවා, සමාජයෙන් කොන්වීමට භාජනය වෙනවා, අවසානයේදී නීතිය හමුවේ මරණ දඬුවම හිමිවෙනවා. අපි මේ නීතිය ශක්තිමත් කළොත් අවසානයේදී මරණ දඬුවම - මේක තමයි නීතිය. දැන් තමන්ගේ දරුවන්ට ආදරේ දෙමව්පියන්... තමන්ගේ දරුවා ආරම්භයේදී මේ මත්ද්‍රව්‍යවලට ලොල් වෙනවා, හැබැයි අවසානය මොකක්ද - නීතිය හමුවේ මරණ දඬුවම. තමන්ගේ ආදරණීය දරුවට මේ ව්‍යසනයට පත්වීම වැළැක්වීම දෙමාපියන්ගේ කාර්යයක්.

</p>

<p>

<span style="color:#dc2626">පූජ්‍ය පක්ෂයේ කාර්ය භාර්යය</span>

</p>

<p>

මම දන්නවා හැම අම්මා තාත්තා කෙනෙක්ම තමන්ගේ දරුවට ව්‍යසනයක් වුණාම පළමුවෙන්ම එන්නේ පන්සලේ හාමුදුරුවන්වහන්සේ හමු වන්න. නැත්නම් අපේ පල්ලියට, අපේ පූජකතුමාට, අපේ කුරුක්කල්තුමාට ඇවිල්ලා කියනවා. ඒ නිසා අපි දන්නවා ආරම්භයේදීම අම්මා තාත්තා කෙළින්ම පොලිසියට එන්නේ නැහැ, "අම්මා තාත්තා වැඩිපුර විවෘත වෙන්නේ එක්කෝ ආගමික නායක උතුමන්ලා වහන්සේලාට, එහෙම නැත්නම් දොස්තර මහත්තයාට. දොස්තර මහත්තුරුන්ටත් යම් ප්‍රමාණයකට විවෘත වෙනවා. හැබැයි ඊට වඩා වැඩි ප්‍රමාණයකට අපේ හාමුදුරුවන් වහන්සේලාට, අපේ පූජකතුමන්ලාට විවෘත වෙනවා. ඒ නිසා ගමේ තියෙන ව්‍යසනය ඉස්සෙල්ලම ඇසෙන්නේ, දකින්නේ අපේ ගම්වල හාමුදුරුවන් වහන්සේලා, අපේ ගම්වල පූජකතුමන්ලා.

</p>

<p>

ඒ නිසා මම හිතනවා මෙහෙම ව්‍යසනයක් පරාජයට පත්කිරීමේදී. අපි සමාජ ධාරාවක් හැටියට තෝරාගත්තු පොලිසිය, හමුදාව, රාජ්‍ය යාන්ත්‍රණය නිල ධාරාව, හැබැයි නිල ධාරාවෙන් ඔබ්බට යන සමාජය සඳහා විශාල මතවාදී මඟපෙන්වීමක් කිරීමේදී, එම කාර්යභාරය පැවරෙන්නේ අපේ හාමුදුරුවන් වහන්සේලාට. ඔබ වහන්සේලා කොපමණ ජනතාවක් දවසකට, මාසයකට, අවුරුද්දකට මුණගැසෙනවද? කොතරම් ප්‍රමාණයක් ධර්ම දේශනාවන් කරනවද? කොතරම් ප්‍රමාණයක් දරුවන්ට දෙමව්පියන්ට අවවාද දෙනවද? කොතරම් ප්‍රමාණයක් ඔවුන්ගේ දුකට, වේදනාවට ඇහුම්කන් දෙනවද? මම හිතනවා මෙතන තමයි අපේ මූලික පවුර තියෙන්නේ. අපේ හාමුදුරුවන් වහන්සේලා ප්‍රමුඛ අපේ පූජකතුමන්ලා තමයි මේ ව්‍යසනය පරාජයට පත්කිරීමේ සමාජ මෙහෙයවීමේ ප්‍රධානතම බලවේගය වන්නේ.

</p>

<p>

මම හිතන්නේ මෑත කාලයේ එක තැනකට එකතු වුණු වැඩිම හාමුදුරුවන් වහන්සේලා ප්‍රමාණයක් මෙම අවස්ථාවට වැඩම කර තිබෙනවා. අපේ මවුලවිතුමන්ලාත් විශාල ප්‍රමාණයක් මෙම අවස්ථාවට සහභාගී වෙනවා. අපේ පූජකතුමන්ලා, අපේ කුරුක්කල්තුමන්ලා යාපනයේ ඉඳන් අද මේ ස්ථානයට ආවා. ඔබ වහන්සේලා තුළ තිබෙන උවමනාව අපිට පෙන්නුම් කර තිබෙනවා. හැබැයි මම නැවත කියනවා මෙය රජයට පමණක් කළ හැකි නම් මෙවැනි සමුළුවක් පවත්වන්නේ නැහැ. රාජ්‍ය නිලධාරීන් කැඳවලා කතා කරනවා. මේක රාජ්‍යයට පමණක් කරන්න බැහැ. මේක කිරීම සඳහා අපි හැමදෙනාගේම දායකත්වයක් සහ සංවිධානාත්මක වීමක් අවශ්‍යයි.

</p>

<p>

අපි ප්‍රමුඛතාවය දෙන්නම්, නීති ටික හදන්නම්, ආයතන ශක්තිමත් කරන්නම්, නඩු අහන්න අධිකරණ හදලා දෙන්නම්, පොලිසිය හමුදාව ක්‍රියාකාරී කරන්නම්, අපේ පුනරුත්ථාපන අධිකාරිය සහ ආයතන අපි පිහිටුවන්නම් එය රජයේ කාර්යභාරයයි. හැබැයි මේ ව්‍යසනය පරාජයට පත්කිරීමේදී විශාලම කාර්යභාරයක් අපේ පොදු ජනතාවට තියෙනවා.

</p>

<p>

එහිදී මම හිතනවා අපේ හාමුදුරුවන් වහන්සේලාගේ කාර්යභාරය විශාලයි කියලා. ඉතින් මම ඔබ වහන්සේලාගෙන් ඉල්ලා සිටින්නේ මෙම කාර්යයේ සක්‍රීය කොටස්කරුවන් බවට පත්වෙන්න කියලා. මම දන්නවා අපේ අස්ගිරි අනුනායක හාමුදුරුවන් වහන්සේ, මල්වතු අනුනායක හාමුදුරුවන් වහන්සේ, අපේ අමරපුර මහා නිකායේ ලේඛාධිකාරී හාමුදුරුවන් වහන්සේ, අපේ රාමඤ්ඤ මහා නිකායේ අනුනායක හාමුදුරුවන් වහන්සේ වරින් වර මේ පිළිබද උනන්දුවෙන් සාකච්ඡා කර තිබෙනවා.

</p>

<p>

ගතවුණු අවුරුද්ද තුළ අවස්ථා හතක් පැය දෙකහමාර, තුන අපි සාකච්ඡා කර තිබෙනවා. මේ ව්‍යසනය පරාජයට පත්කරන්න. අපේ කුරුක්කල්තුමන්ලා, අපේ මවුලවිතුමන්ලා, අපේ පූජකතුමන්ලා විශාල උනන්දුවෙන් යෝජනා ඉදිරිපත් කළා. දැන් මේක විශාල ජාතික ව්‍යාපාරයක් බවට පත්කරන්න ඕනේ. දේශපාලන බෙදීම්, අනෙකුත් බෙදීම් සියල්ල යටින් තියාගනිමු. අද බෙදීම් දෙකයි තියෙන්නේ: මේ මත්ද්‍රව්‍ය, සන්නද්ධ අපරාධ කල්ලි හා ගොඩනැගුණු අපරාධ රාජ්‍යයට සහය දෙන අය සහ ඊට එරෙහි වන අය.

</p>

<p>

අපිට වසර කිහිපයක් අඛණ්ඩව අතහරින්නේ නැතුව මේ ව්‍යායාමයේ යෙදුනොත් අපේ ජාතිය මේ ව්‍යසනයෙන් මුදවාගන්න හැකියි. අපේ අනාගත තරුණ පරම්පරාවට සුරක්ෂිත අනාගතයක් නිර්මාණය කරන්න, අපේ සමාජයට ගැටුම්කාරී නොවෙන ආරක්ෂිත සමාජයක් නිර්මාණය කරන්න පුළුවන්. අපේ දුවා දරුවන්ට තමන්ගේ රටේ අභිමානයෙන් ජීවත්වෙන්න පුළුවන් රටක් අපිට හදන්න පුළුවන්. මම හිතනවා ඒ කාර්යභාරයේදී ඔබ වහන්සේලාට පැවරී තිබෙන කාර්යය විශාලයි. මම ආරාධනා කරනවා, ආයාචනා කරනවා ඒ කාර්යයේ පංගුකාරයන්, කොටස්කාරයන් බවට පත්වෙන්න කියලා.

</p>

<p>

සියම් මහා නිකායේ මල්වතු මහාවිහාර පාර්ශ්වයේ අනුනායක අතිපූජ්‍ය නියංගොඩ විජිතසිරි ස්වාමීන් වහන්සේ, සියම් මහා නිකායේ අස්ගිරි පාර්ශ්වයේ අනුනායක අතිපූජ්‍ය නාරම්පනාවේ ආනන්ද ස්වාමීන් වහන්සේ, ශ්‍රී ලංකා අමරපුර මහා සංඝ සභාවේ මහා ලේඛකාධිකාරී අතිපූජ්‍ය බලපිටියේ සිරි සීවලි ස්වාමීන් වහන්සේ, ශ්‍රී ලංකා රාමඤ්ඤ මහා නිකායේ අනුනායක අතිපූජ්‍ය වලේබොඩ ගුණසිරි ස්වාමීන්වහන්සේ ප්‍රමුඛ ත්‍රෛනිකායික මහා සංඝරත්නයද, අතිඋතුම් හැරල් ඇන්තනී පෙරේරා රදගුරුතුමා ප්‍රමුඛ කතෝලික පූජකතුමන්ලා, ශ්‍රී වේලු සුරේෂ් ෂර්මා කුරුක්කල්තුමා ඇතුළු හින්දු කුරුක්කල්තුමන්ලා, ෂෙයික් මොහොමඩ් අර්කම් නූරාමිත් මවුලවිතුමා ඇතුළු මවුලවිතුමන්ලාද මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල, බුද්ධශාසන ආගමික සහ සංස්කෘතික කටයුතු අමාත්‍ය ආචාර්ය සුනිල් සෙනෙවි යන මහත්වරු ඇතුළු කැබිනට් අමාත්‍යවරු, නියෝජ්‍ය අමාත්‍යවරු සහ පාර්ලිමේන්තු මන්ත්‍රීවරුද, ජනාධිපති ලේකම් ඇතුළු අමාත්‍යාංශ ලේකම්වරු සහ රාජ්‍ය නිලධාරින්ද, ත්‍රිවිධ හමුදාපතිවරු, පොලිස්පති ඇතුළු ආරක්ෂක අංශ සාමාජිකයන්ද, කලාකරුවන්, ක්‍රීඩකයින්, මාධ්‍යවේදීන් සහ මත්ද්‍රව්‍ය විරෝධි සංවිධාන නියෝජනය කරමින් පැමිණි නියෝජිතයෝ ඇතුළු විශාල පිරිසක් මෙම අවස්ථාවට එක්ව සිටියහ.

</p>

<p>

“රටම එකට” ජාතික මෙහෙයුමේ නිල වෙබ් අඩවිය වන www.1818.gov.lk වෙබ් අඩවිය දියත් කිරීමද මෙහිදී ජනාධිපතිවරයා විසින් සිදුකළේය.