කොළඹ ජාතික රෝහලේ අංශ කිහිපයක් ජලයෙන් යට වුනේ ඇයි?...

කොළඹට ඊයේ (නොවැම්බර් 06) පස්වරුවේ ඇදහැලුණු අධික වර්ෂාව හේතුවෙන් කොළඹ ජාතික රෝහලේ හදිසි අනතුරු අංශය ඇතුළු අංශ කිහිපයක් ජලයෙන් යට වූ බව වාර්තා වේ. කෙසේ වෙතත් රෝහල් කාර්ය මණ්ඩලයේ ඉක්මන් ක්‍රියාමාර්ග හේතුවෙන් පැය කිහිපයකින් එම ප්‍රදේශ පිරිසිදු කර රෝහලේ කටයුතු නැවත සාමාන්‍ය තත්ත්වයට පත් කර තිබිණි.

</p>

<p>

කාලගුණ විද්‍යා දෙපාර්තමේන්තුව පැවසූ පරිදි ඊයේ පස්වරුවේ පැය කිහිපයක් ඇතුළත කොළඹට මිලිමීටර් 129ක වර්ෂාපතනයක් ලැබී තිබේ. මෙම දැඩි වැස්ස හේතුවෙන් කොළඹ නගරයේ පහත් බිම් රැසක් මෙන්ම ප්‍රධාන මාර්ග කිහිපයක්ද ජලයෙන් යට වූ අතර මරදාන, බොරැල්ල, බම්බලපිටිය ආශ්‍රිත ප්‍රදේශවල දැඩි රථවාහන තදබදයක් ඇති විය.

</p>

<p>

ජාතික රෝහලේ හදිසි අනතුරු අංශය, බාහිර රෝගී අංශය, විකිරණ අංශ, ශෛල්‍යාගාර ඇතුළු රෝගී වාට්ටු රැසක් ජලයෙන් යටවූ බව වාර්තා වූ අතර, ජල ගැලීම හේතුවෙන් හදිසි අනතුරු අංශයේ විදුලි සෝපාන කිහිපයක් අක්‍රීය වී තිබේ. රෝගීන් වෙනත් වාට්ටු වෙත යොමු කිරීම සඳහා රෝහල් කාර්ය මණ්ඩලයට දැඩි පරිශ්‍රමයක් දැරීමට සිදුවිය.

</p>

<p>

මෙම ජල ගැලීමට හේතුවක් ලෙස නොරිස් ඇළ නිසි පරිදි පිරිසිදු නොකිරීම සහ නඩත්තු නොකිරීම, ඇළ දෙපස අනවසර ඉදිකිරීම් මෙන්ම වෙළඳසැල්වලින් අවිධිමත් ලෙස කසල බැහැර කිරීම වැනි ක්‍රියාකාරකම් හේතුවී ඇති බව මූලික නිරීක්ෂණවලදී අනාවරණය වී ඇත. අවසාන වශයෙන් කොළඹ නගර සභාව මේ ව්‍යසනයට වගකිවයුතු බව පැහැදිලි වී ඇත. කොළඹ නගර සභාවේ ජලාපවහන පද්ධතිය නඩත්තු කිරීමේ දුර්වලතා පිළිබඳව දිගු කලක් තිස්සේ පැමිණිලි එල්ල වී ඇති අතර, අධික වර්ෂාවක් එකවර ඇදහැලුණු විට එම ගැටලු තවත් උග්‍ර වන බව නිරීක්ෂකයෝ පෙන්වා දෙති.

</p>

<p>

රෝහල් කාර්ය මණ්ඩලය බලපෑමට ලක් වූ ප්‍රදේශ ඉක්මනින් පිරිසිදු කර ඇති අතර, අද (නොවැම්බර් 07) උදෑසන වන විට රෝහලේ කටයුතු සාමාන්‍ය තත්ත්වයට පත්ව තිබේ.

</p>

<p>

මෙම සිදුවීම කොළඹ නගරයේ ජලාපවහන පද්ධතියේ දුර්වලතා සහ අධික වර්ෂාපතනයන්ට මුහුණ දීමේ සූදානම පිළිබඳව නැවතත් අවධානය යොමු කර ඇත.