ගිනිකොණ දිග බෙංගල බොක්කේ වර්ධනය වන කාලගුණික කැළඹිල්ල අඩුපීඩන කලාපයක් සහ පීඩන අවපාතයක් දක්වා වර්ධනය විය හැකියි... කාලගුණ විද්‍යා දෙපාර්තමේන්තුව පවසයි !

ගිනිකොණ දිග බෙංගල බොක්ක සහ යාබද අන්දමන් මුහුදු ප්‍රදේශය ආශ්‍රිතව හෙට (නොවැම්බර් 11 වන දින) පමණ පහළ වායුගෝලීය කැළඹිලි ස්වභාවයක් ඇතිවීමේ හැකියාවක් පවතින බව කාලගුණ විද්‍යා දෙපාර්තමේන්තුව පුරෝකථනය කරයි.

</p>

<p>

එම කැළඹිල්ල නොවැම්බර් 13 වන දින පමණ අඩුපීඩන කලාපයක් දක්වා වර්ධනය වීමට ඉඩ ඇති අතර, ඉන් අනතුරුව නොවැම්බර් 15 වන දින පමණ නිරිත දිග බෙංගල බොක්කේදී පීඩන අවපාතයක් දක්වා තවදුරටත් වර්ධනය වීමේ අඩු සම්භාවිතාවක් පවතින බව දත්ත හා ආකෘති මගින් එම දෙපාර්තමේන්තුව පෙන්වා දී ඇත.

</p>

<p>

දෙපාර්තමේන්තුවේ කාර්යයේ නියුතු කාලගුණ විද්‍යාඥ උදේනි වීරසිංහ ප්‍රකාශ කර ඇත්තේ, මෙම පද්ධතියේ ගමන් මාර්ගය සහ තීව්‍රතාව පිළිබඳව තවමත් ප්‍රමාණවත් නිශ්චිත දත්ත නොමැති බවත්, ඉදිරියේදී වැඩිදුර අධ්‍යයනය කර අවශ්‍ය අනතුරු ඇඟවීම් නිකුත් කරන බවත්ය.

</p>

<p>

පද්ධතිය නැගෙනහිර වෙරළ ආශ්‍රිතව උතුරු දෙසට ගමන් කළහොත් උතුර, උතුරු-මැද සහ නැගෙනහිර පළාත්වල වැසි තත්ත්වයේ වැඩිවීමක් ඇතිවිය හැකි බව ද දක්වා ඇත. කෙසේ වෙතත් එහි බලපෑම දැඩි විය හැකි ද යන්න තවමත් අවිනිශ්චිතය.

</p>

<p>

ඉන්දියාවේ කාලගුණ විද්‍යා දෙපාර්තමේන්තුවේ (IMD) කලාපීය විශේෂිත කාලගුණ මධ්‍යස්ථානය (RSMC New Delhi) ද මෙම අනාවැකියට අනුකූලව පවසා ඇත්තේ, නොවැම්බර් 11 වන දින පමණ ගිනිකොණ දිග බෙංගල බොක්කේ ඉහළ වායුගෝලීය චක්‍රීය සංසරණයක් ඇතිවිය හැකි බවත්, එහි බලපෑමෙන් නොවැම්බර් 13 වන දින පමණ අඩුපීඩන කලාපයක් නිර්මාණය විය හැකි බවත්ය.

</p>

<p>

නොවැම්බර් 15 වන දින පමණ නිරිත දිග බෙංගල බොක්කේදී එය පීඩන අවපාතයක් දක්වා වර්ධනය වීමේ අඩු සම්භාවිතාවක් ඇති බව IMD ආකෘති සහ විශ්ලේෂණවලින් පෙන්වා දී ඇත. ගමන් මාර්ගය සහ තීව්‍රතාව පිළිබඳව ආකෘති අතර සැලකිය යුතු අවිනිශ්චිතතාවක් පවතින බව ද සටහන් වේ.

</p>

<p>

<span style="color:#dc2626">අද සහ ආසන්න දිනවල කාලගුණය</span>

</p>

<p>

කාලගුණ විද්‍යා දෙපාර්තමේන්තුව නිවේදනය කර ඇත්තේ, උතුරු පළාතේ සහ ත්‍රිකුණාමලය දිස්ත්‍රික්කයේ විටින් විට වැසි හෝ ගිගුරුම් සහිත වැසි ඇති විය හැකි බවය.

</p>

<p>

දිවයිනේ සෙසු ප්‍රදේශවල පස්වරු 1න් පසු වැසි හෝ ගිගුරුම් සහිත වැසි ඇති වනු ඇත. බස්නාහිර, සබරගමුව, මධ්‍යම සහ ඌව පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවලට මිලිමීටර් 100ට වැඩි තද වැසි ඇති විය හැකිය. ගිගුරුම් සහිත වැසි සමඟ තාවකාලික තද සුළං සහ අකුණු අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් ඉල්ලා සිටී.

</p>

<p>

බස්නාහිර, සබරගමුව, මධ්‍යම සහ ඌව පළාත්වලත් ගාල්ල, මාතර සහ කුරුණෑගල දිස්ත්‍රික්කවලත් ඇතැම් ස්ථානවල අලුයම් කාලයේ මීදුම් සහිත තත්ත්වයක් පැවතිය හැකිය. දිවයින වටා මුහුදු ප්‍රදේශවල ද වැසි හෝ ගිගුරුම් සහිත වැසි ඇති විය හැකි අතර, තාවකාලිකව පැයට කිලෝමීටර් 60–70ක පමණ තද සුළං සහ රළු මුහුදු තත්ත්වයක් ඇතිවිය හැකි බව ද දැනුම් දී ඇත.

</p>

<p>

ධීවර සහ නාවික ප්‍රජාවට මෙම මුහුදු ප්‍රදේශවල කටයුතු කිරීමේදී විශේෂ අවධානයෙන් සිටින ලෙසත්, ඉදිරි නිවේදනවලට අවධානය යොමු කරන ලෙසත් උපදෙස් දී ඇත.

</p>

<p>

කාලගුණ විද්‍යා දෙපාර්තමේන්තුව අඛණ්ඩව මෙම පද්ධතිය නිරීක්ෂණය කරමින් සිටින අතර, තත්ත්වයේ වෙනස්කම් සිදුවන පරිදි යාවත්කාලීන නිවේදන නිකුත් කරනු ඇත. මහජනතාවට ඉල්ලා සිටින්නේ නිල කාලගුණ නිවේදනවලට අවධානය යොමු කර, අවශ්‍ය පූර්වෝපායන් ගන්නා ලෙසයි.