මහවැලිය හරහා අලුත් දුම්රිය පාලමක් හැදීමට කැබිනට් අනුමැතිය!

සරසවි උයන සහ පේරාදෙණිය අතර මහවැලි නදිය හරහා අලුතින් දුම්රිය පාලමක් ඉදිකිරීම සඳහා ඉදිරිපත් කරන ලද යෝජනාවට අමාත්‍ය මණ්ඩලයේ අනුමැතිය හිමිවී තිබේ. මෙම ව්‍යාපෘතිය සඳහා මූල්‍ය ආධාර සහය ලබාදීමට ඉන්දියාව පියවර ගෙන ඇත.

</p>

<p>

මහනුවර නගරාසන්න ප්‍රදේශය ආවරණය වන පරිදි පුළුල් හා කාර්යක්ෂම නගරාසන්න දුම්රිය ජාලයක් සංවර්ධනය කිරීමේ සහ දුම්රිය සබඳතා ප්‍රවර්ධනය කිරීමේ පියවරක් ලෙස, මාතලේ දුම්රිය මාර්ගයට අයත් වන පරිදි මෙම නව පාලම ඉදිකිරීමට නියමිතය.

</p>

<p>

අමාත්‍ය මණ්ඩල තීරණයට අනුව, 'දිට්වා' (Ditwah) සුළි සුළඟින් හානියට පත් දුම්රිය යටිතල පහසුකම් නැවත ගොඩනැගීම සහ සංවර්ධනය කිරීම වෙනුවෙන් වෙන් කර ඇති ඉන්දීය ණය ආධාර යෝජනා ක්‍රමය (Indian Line of Credit) යටතේ මෙම ව්‍යාපෘතිය සඳහා අවශ්‍ය මුදල් ප්‍රතිපාදන ලබාගැනීමට කටයුතු යොදා ඇත.

</p>

<p>

යෝජිත නව දුම්රිය පාලම ඉදිකිරීමත් සමග මාතලේ දුම්රිය මාර්ගය, දිවයිනේ ප්‍රධාන දුම්රිය ජාලය සමග වඩාත් පහසුවෙන් හා කාර්යක්ෂමව බද්ධ කිරීමට හැකියාව ලැබෙනු ඇතැයි අපේක්ෂා කෙරේ.

</p>

<p>

මීට අමතරව, මහනුවර නගරාසන්න ප්‍රදේශයේ පුළුල් දුම්රිය ජාලයක් සංවර්ධනය කිරීමට රජය සැලසුම් කර ඇති අතර, ඊට අදාළ ශක්‍යතා අධ්‍යයන කටයුතු මේ වන විට සිදුකෙරෙමින් පවතී.

</p>

<p>

මෙම සංවර්ධන සැලසුම් යටතේ, පේරාදෙණිය හරහා කඩුගන්නාව සිට ගම්පොළ දක්වා වන ප්‍රධාන දුම්රිය මාර්ගය ද්විත්ව දුම්රිය මාර්ගයක් (දෙපාරක්) බවට පරිවර්තනය කිරීමට යෝජිතය. එසේම, පේරාදෙණිය සහ කටුගස්තොට අතර පිහිටි මාතලේ දුම්රිය මාර්ග කොටස ද ද්විත්ව දුම්රිය මාර්ගයක් ලෙස සංවර්ධනය කිරීමට සැලසුම් කර තිබේ.

</p>

<p>

දැනට පවතින තනි දුම්රිය මාර්ග පද්ධතිය හේතුවෙන් ඇතිවී තිබෙන ධාරිතා සීමාසහිත භාවයට විසඳුම් ලබාදෙමින්, දුම්රිය ගමනාගමන සේවාවන්හි විශ්වාසනීයත්වය සහ සබඳතාව තවදුරටත් ඉහළ නැංවීමේ අවශ්‍යතාව රජය විසින් හඳුනාගෙන ඇත.

</p>

<p>

ඒ අනුව, ප්‍රවාහන, මහාමාර්ග සහ නාගරික සංවර්ධන අමාත්‍යවරයා විසින් ඉදිරිපත් කරන ලද මෙම යෝජනාවට අමාත්‍ය මණ්ඩල අනුමැතිය හිමිවී තිබේ.