දෙදින විවාදයකින් පසු 22 වැනි ආණ්ඩුක්‍රම ව්‍යවස්ථා සංශෝධනය සහ අධිකරණ සංශෝධන පනත් කෙටුම්පත පාර්ලිමේන්තුවේ තුනෙන් දෙකකින් සම්මත වූ හැටි!

ශ්‍රී ලංකා පාර්ලිමේන්තුවේ දී දින දෙකක් පුරා පැවැති දීර්ඝ හා උණුසුම් විවාදයකින් අනතුරුව 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත සහ ඊට අදාළ අධිකරණ සංවිධාන (සංශෝධන) පනත් කෙටුම්පත විශේෂ වැඩි ඡන්දයෙන් අද (25) දින සම්මත විය.

</p>

<p>

මෙම පනත් කෙටුම්පත් ද්විත්වය ප්‍රධාන වශයෙන්ම අවධානය යොමු කරන්නේ උසස් අධිකරණවල විනිසුරුවරුන්ගේ විශ්‍රාම යෑමේ වයස දීර්ඝ කිරීම ඇතුළු සමස්ථ අධිකරණ පද්ධතියේ සේවය කරන විනිසුරුවරුන්ගේ විශ්‍රාම වයස දීර්ඝ කිරීම සහ මහාධිකරණ ඇතුළු ඉහළ අධිකරණවල විනිසුරුවරුන් සංඛ්‍යාව ඉහළ නැංවීම කෙරෙහිය.

</p>

<p>

සැප්තැම්බර් 24 සහ 25 යන දිනවල පැවැති දීර්ඝ විවාදයෙන් අනතුරුව අද පස්වරු 7.15 ත් 7.30 ත් අතර කාලය තුළ ඡන්ද විමසීම පැවැත්විණි. එහිදී 22 වැනි ආණ්ඩුක්‍රම ව්‍යවස්ථා සංශෝධනයේ දෙවැනි වර කියවීම සඳහා පක්ෂව ඡන්ද 158 ක් ලැබුණු අතර ඊට විරුද්ධව ලැබුණේ ඡන්ද 63 කි. කිසිවෙකුත් ඡන්දය දීමෙන් වැළකී සිටියේ නැත. ඒ අනුව වැඩිඡන්ද 95 ක විශේෂ බහුතරයකින් එය සම්මත විය. අනතුරුව කාරක සභා අවස්ථාවේ දී ඉදිරිපත් වූ සංශෝධන ද සහිතව පනත් කෙටුම්පතේ තෙවැනි වර කියවීම ද එම ඡන්ද සංඛ්‍යාවෙන්ම (පක්ෂව 158, විරුද්ධව 63) සම්මත කර ගැනීමට ආණ්ඩුව සමත් විය.

</p>

<p>

අධිකරණ සංවිධාන සංශෝධන පනත් කෙටුම්පත ලෙස හඳුන්වනු ලබන පනත් කෙටුම්පතේ දෙවැනි වර කියවීම ද කිසිදු සංශෝධනයකින් තොරව පක්ෂව ඡන්ද 158 ක් සහ විරුද්ධව ඡන්ද 63 ක් ලෙස එම ඡන්ද පරතරයෙන්ම අද දින සම්මත විය.

</p>

<p>

අධිකරණ පද්ධතියේ පවතින අධික නඩු කටයුතු ප්‍රමාණය කඩිනමින් අවසන් කිරීම සහ අත්දැකීම් බහුල ජ්‍යෙෂ්ඨ විනිසුරුවරුන්ගේ සේවය තවදුරටත් අධිකරණ පද්ධතිය වෙත ලබා ගැනීම මෙම ව්‍යවස්ථා සංශෝධනයේ ප්‍රධාන අරමුණ බව රජය පෙන්වා දුන්නේය. කෙසේ වෙතත් විපක්ෂය, ශ්‍රී ලංකා නීතිඥ සංගමය (BASL) සහ සිවිල් සංවිධාන ගණනාවක් මෙම පනත් කෙටුම්පත්වලට දැඩි ලෙස විරෝධය පළ කළ අතර, ඔවුන් චෝදනා කළේ මෙමගින් අධිකරණයේ ස්වාධීනත්වයට දැඩි තර්ජනයක් සහ බලපෑමක් එල්ල වන බවය.

</p>

<p>

<span style="color:#dc2626">පනත් කෙටුම්පත් ද්විත්වයෙන් සිදුවන වෙනස්කම්</span>

22 වැනි ආණ්ඩුක්‍රම ව්‍යවස්ථා සංශෝධනය මගින් ආණ්ඩුක්‍රම ව්‍යවස්ථාවට කෙරෙන ප්‍රධාන සංශෝධන මෙසේය:

<span style="color:#1d4ed8">ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස:</span> ශ්‍රේෂ්ඨාධිකරණ විනිසුරුවරුන් විශ්‍රාම යන වයස අවුරුදු 65 සිට අවුරුදු 67 දක්වා ඉහළ නැංවීම.</p>

<p>

<span style="color:#1d4ed8">අභියාචනාධිකරණ විනිසුරුවරුන්ගේ විශ්‍රාම වයස:</span> අභියාචනාධිකරණ විනිසුරුවරුන් විශ්‍රාම යන වයස අවුරුදු 63 සිට අවුරුදු 65 දක්වා ඉහළ නැංවීම.</p>

<p>

<span style="color:#1d4ed8">අග්‍ර විනිශ්චයකාරවරයාගේ ධුර කාලය:</span> අග්‍ර විනිශ්චයකාරවරයා අවුරුදු 67 දී හෝ අග්‍ර විනිශ්චයකාර ධුරයේ වසර හයක (06) කාලයක් පූර්ණය වූ පසු (එයින් පළමුවෙත එළඹෙන අවස්ථාවේ දී) විශ්‍රාම යා යුතුය. කෙසේ වෙතත් මෙම පනත බලගන්වන අවස්ථාවේ ධුරයේ පසුවන අග්‍ර විනිශ්චයකාරවරයා සඳහා මෙම වසර හයේ සීමාව අදාළ නොවේ.</p>

<p>

<span style="color:#1d4ed8">අභියාචනාධිකරණ විනිසුරුවරුන් සංඛ්‍යාව:</span> අභියාචනාධිකරණයේ සභාපති විනිසුරුවරයා හැර සසුත් විනිසුරුවරුන්ගේ උපරිම සංඛ්‍යාව 19 සිට 24 දක්වා ඉහළ නැංවීම.</p>

<p>

ආණ්ඩුක්‍රම ව්‍යවස්ථාවට නොව සාමාන්‍ය නීතියට සංශෝධන එකතු කරන අධිකරණ සංවිධාන (සංශෝධන) පනත් කෙටුම්පත මගින් පහත වෙනස්කම් සිදුවේ:

<span style="color:#1d4ed8">මහාධිකරණ විනිසුරුවරුන් සංඛ්‍යාව:</span> මහාධිකරණ විනිසුරුවරුන්ගේ සංඛ්‍යාව 110 සිට 120 දක්වා වැඩි කිරීම.

</p>

<p>

<span style="color:#1d4ed8">මහාධිකරණ විනිසුරුවරුන්ගේ විශ්‍රාම වයස: </span>මහාධිකරණ විනිසුරුවරුන්ගේ විශ්‍රාම යන වයස අවුරුදු 61 සිට අවුරුදු 63 දක්වා ඉහළ නැංවීම.

</p>

<p>

<span style="color:#1d4ed8">අනෙකුත් විනිසුරුවරුන් සහ මහේස්ත්‍රාත්වරුන්:</span> සසුත් අධිකරණ විනිසුරුවරුන්ගේ සහ මහේස්ත්‍රාත්වරුන්ගේ විශ්‍රාම යන වයස අවුරුදු 62 ලෙස නියම කිරීම.

</p>

<p>

මෙම අධිකරණ සංවිධාන සංශෝධන පනත් කෙටුම්පත ආණ්ඩුක්‍රම ව්‍යවස්ථාවට අනුකූල වන බැවින් එය පාර්ලිමේන්තුවේ සාමාන්‍ය වැඩිඡන්දයකින් සම්මත කළ හැකි බව ශ්‍රේෂ්ඨාධිකරණය මීට පෙර තීන්දු කර තිබිණි. ආණ්ඩුක්‍රම ව්‍යවස්ථා සංශෝධනය සඳහා පාර්ලිමේන්තුවේ තුනෙන් දෙකක (2/3) විශේෂ බහුතර බලයක් අවශ්‍ය වූ අතර, ජනමත විචාරණයකට යොමු කිරීමේ අවශ්‍යතාවක් නොමැති බව තීරණය විය.

</p>

<p>

<span style="color:#dc2626">ශ්‍රේෂ්ඨාධිකරණ තීන්දුව</span>

</p>

<p>

22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත සම්බන්ධයෙන් ශ්‍රේෂ්ඨාධිකරණ පංචපුද්ගල විනිසුරු මඬුල්ල ලබා දුන් තීන්දුව කථානායක ආචාර්ය ජගත් වික්‍රමරත්න විසින් අඟහරුවාදා (සැප්තැම්බර් 22) පාර්ලිමේන්තුවට දැනුම් දෙන ලදී. අග්‍ර විනිශ්චයකාර පී. පද්මන් සුරසේන මහතාගේ ප්‍රධානත්වයෙන් යුතු වූ මෙම විනිසුරු මඬුල්ලට අචල වෙංගප්පුලි, අර්ජුන ඔබේසේකර, සම්පත් බී. අබේකෝන් සහ කේ.එම්. ගිහාන් එච්. කුලතුංග යන ශ්‍රේෂ්ඨාධිකරණ විනිසුරුවරු ඇතුළත් වූහ.

</p>

<p>

22 වැනි ආණ්ඩුක්‍රම ව්‍යවස්ථා සංශෝධනය අභියෝගයට ලක් කරමින් ශ්‍රේෂ්ඨාධිකරණය හමුවේ පෙත්සම් 67 ක් වැනි වාර්තාගත සංඛ්‍යාවක් ගොනු කර තිබිණි. දැනට සේවයේ නිරත විනිසුරුවරුන්ගේ ධුර කාලය දීර්ඝ කිරීම අධිකරණයට කෙරෙන බලපෑමක් හෝ අල්ලසක් විය හැකි බවත්, මෙමගින් ආණ්ඩුක්‍රම ව්‍යවස්ථාවේ 3 වැනි වගන්තිය යටතේ සුරක්ෂිත කර ඇති ජනතා පරමාධිපත්‍යයට හානි සිදුවන බැවින් මෙය ජනමත විචාරණයකින් සම්මත විය යුතු බවත් පෙත්සම්කරුවෝ තර්ක කළහ.

</p>

<p>

කෙසේ වෙතත් ශ්‍රේෂ්ඨාධිකරණය එම තර්කය ප්‍රතික්ෂේප කළේය. සේවයේ නිරත සියලුම විනිසුරුවරුන්ගේ විශ්‍රාම වයස එක හා සමානව සහ අත්තනෝමතික නොවන ලෙස ඉහළ නැංවීම "නීතිමය අල්ලසක්" හෝ "අධිකරණය තමන්ට අවශ්‍ය පරිදි සකස් කර ගැනීමක් (Court Packing)" නොවන බව ශ්‍රේෂ්ඨාධිකරණය ප්‍රකාශ කළේය. එසේ වුවද පනත් කෙටුම්පතේ 2 වැනි වගන්තියේ වචන භාවිතයන් දෙකක් සංශෝධනය කරන ලෙස අධිකරණය නියෝග කළ අතර, දැනට ධුරයේ සිටින අග්‍ර විනිශ්චයකාරවරයාට වසර හයේ ධුර කාල සීමාව අදාළ නොවන බවට වන දෙවැනි කොන්දේසිය ද ඊට ඇතුළත් විය. පාර්ලිමේන්තුව අවසාන ඡන්ද විමසීමට පෙර එම සංශෝධන පනත් කෙටුම්පතට ඇතුළත් කිරීමට පියවර ගත්තේය.

</p>

<p>

<span style="color:#dc2626">පාර්ලිමේන්තු විවාදය පැවැති අයුරු</span>

</p>

<p>

සැප්තැම්බර් 24 වැනිදා විවාදය ආරම්භ කරමින් අධිකරණ හා ජාතික ඒකාබද්ධතා අමාත්‍ය හර්ෂණ නානායක්කාර ප්‍රකාශ කළේ මෙම පනත් කෙටුම්පත් ඉදිරිපත් කළේ අධිකරණය පාලනය කිරීමට හෝ මර්දනය කිරීමට නොවන බවය. මෙහි ප්‍රධාන අරමුණ නඩු කටයුතු කඩිනම් කර ජනතාවට කාර්යක්ෂම ලෙස සාධාරණය ඉටු කිරීම බව හෙතෙම පැවසීය. දැනට අධිකරණ පද්ධතියේ විසඳීමට නොහැකිව ගොඩගැසී ඇති නඩු ලක්ෂ 11 කට ආසන්න ප්‍රමාණය පිළිබඳව සහ ජනගහනයට සාපේක්ෂව සිටින විනිසුරුවරුන්ගේ අඩු සංඛ්‍යාව පිළිබඳව ද අමාත්‍යවරයා පෙන්වා දුන්නේය. තවද අධිකරණ සේවා කොමිෂන් සභාව හරහා අධිකරණ කාර්ය මණ්ඩල සඳහා 1,700 කට ආසන්න පිරිසක් අලුතින් බඳවා ගැනීමට කටයුතු කරමින් සිටින බව ද අමාත්‍යවරයා සඳහන් කළේය.

</p>

<p>

මෙම ප්‍රතිසංස්කරණ 2024 වසරේ ආරම්භ කරන ලද පුළුල් අධිකරණ ප්‍රතිසංස්කරණ වැඩසටහනක කොටසක් බවත්, එය ජනතාව ලබා දුන් ජන වරමට අනුකූල වන බවත් අමාත්‍ය නානායක්කාර පැවසීය. ආණ්ඩුව ඒකාධිපති ගමනක යෙදෙන බවට විපක්ෂය නගන චෝදනා ප්‍රතික්ෂේප කළ අමාත්‍යවරයා මෙම සංශෝධන ඉදිරියටම ගෙන යන බව තහවුරු කළේය.

</p>

<p>

කෙසේ වෙතත් විපක්ෂය සහ සිවිල් සංවිධාන පෙන්වා දුන්නේ මේ සඳහා තෝරාගත් කාලය සුදුසු නොවන බවය. නව ආණ්ඩුක්‍රම ව්‍යවස්ථාවක් ගෙන ඒමට පොරොන්දු වී තිබියදී, ඊට පෙර විනිසුරුවරුන්ගේ ධුර කාලය දීර්ඝ කිරීම රජයට හිතවත් විනිසුරුවරුන් තවදුරටත් තබා ගැනීමට ගන්නා උත්සාහයක් ලෙස පෙනෙන බව ඔවුහු තර්ක කළහ. සැප්තැම්බර් 24 වැනිදා පොල්දූව හන්දියේ පැවැති විරෝධතාවයකට එක්වෙමින් සමගි ජන බලවේගයේ නායක සජිත් ප්‍රේමදාස ප්‍රකාශ කළේ සජබ ආණ්ඩුවක් යටතේ මෙම සංශෝධනය අහෝසි කරන බවය. මෙම සංශෝධනය එකම පක්ෂයක පාලනයකට මග පාදන පියවරක් ලෙස ද ඔහු හැඳින්වීය. අධික වර්ෂාව මධ්‍යයේ වුවද මෙම විරෝධතාව පැවැත්විණි.

</p>

<p>

ශ්‍රී ලංකා නීතිඥ සංගමය ඇතුළු වෘත්තීය සමිති සහ සංවිධාන පාර්ලිමේන්තු මන්ත්‍රීවරුන්ගෙන් ඉල්ලා සිටියේ තම ස්වාධීන මතයට හා හෘද සාක්ෂියට එකඟව ඡන්දය භාවිත කරන ලෙසය. ආණ්ඩු පක්ෂයේ මන්ත්‍රීවරුන් කිහිප දෙනෙකුගෙන් ද සිවිල් සංවිධාන මෙම ඉල්ලීම සිදුකර තිබිණි. විපක්ෂයේ මන්ත්‍රීවරුන් කිහිප දෙනෙකු පනතට පක්ෂව ඡන්දය දෙනු ඇතැයි අපේක්ෂා කෙරුණු අතර, ඉලංකෙයි තමිළ් අරසු කච්චි (ITAK) මන්ත්‍රී ශානක්කියන් රාසමානික්කම් පැවසුවේ මෙම සංශෝධනය සම්පූර්ණ නව ආණ්ඩුක්‍රම ව්‍යවස්ථාවක කොටසක් ලෙස පැමිණියේ නම් තම පක්ෂය ඊට සහයෝගය දැක්වීමට ඉඩ තිබූ බවය.

</p>

<p>

ආණ්ඩු පක්ෂයේ මැති ඇමැතිවරුන් ප්‍රකාශ කළේ අමතර මහාධිකරණ විනිසුරුවරුන් පත් කිරීම මගින් තදබදය සහිත ප්‍රදේශවල තවත් අධිකරණ විවෘත කිරීමට හැකි වන අතර, ජ්‍යෙෂ්ඨ විනිසුරුවරුන් තවත් වසර දෙකක් සේවයේ තබා ගැනීම මගින් නඩු ප්‍රමාදය අවම කර ගත හැකි බවය. එහෙත් විවේචකයන් පෙන්වා දුන්නේ වැඩිම නඩු ප්‍රමාණයක් ගොඩගැසී ඇත්තේ ඉහළ අධිකරණවල නොව මහේස්ත්‍රාත් සහ දිසා අධිකරණවල බවය. එමෙන්ම කෙටි කාලයකට ධුර කාලය දීර්ඝ කිරීමට වඩා අධිකරණයේ ස්වාධීනත්වය ආරක්ෂා කිරීම වැදගත් වන බව ද ඔවුහු පෙන්වා දුන්හ.

</p>

<p>

<span style="color:#dc2626">ඉදිරියට සිදුවන දේ</span>

</p>

<p>

දෙවැනි සහ තෙවැනි වර කියවීම් අවසන් වී අවශ්‍ය විශේෂ බහුතර බලය ද හිමිවීමත් සමග 22 වැනි ආණ්ඩුක්‍රම ව්‍යවස්ථා සංශෝධනය නීතියක් බවට පත්වීම සඳහා වූ නීතිමය පියවර වෙත ඉදිරියට ගමන් කරමින් ඇත. සාමාන්‍ය වැඩිඡන්දයක් පමණක් අවශ්‍ය වූ අධිකරණ සංවිධාන සංශෝධන පනත් කෙටුම්පත ද දෙවැනි වර කියවීම සාර්ථකව සම්පූර්ණ කර තිබේ.

</p>

<p>

ජාතික ජන බලවේගයේ (NPP) ප්‍රධාන මැතිවරණ පොරොන්දුවක් වූ නව ආණ්ඩුක්‍රම ව්‍යවස්ථාවක් සකස් කිරීමේ කටයුතු කරන බව රජය ප්‍රකාශ කර ඇත. කෙසේ වෙතත් විපක්ෂය දැනටමත් ප්‍රකාශ කර ඇත්තේ තමන් නැවත බලයට පත් වුවහොත් මෙම 22 වැනි සංශෝධනය අහෝසි කිරීමට කටයුතු කරන බවය.

</p>

<p>

ශ්‍රේෂ්ඨාධිකරණ පෙත්සම් 67 ක්, දින දෙකක පාර්ලිමේන්තු විවාදයක්, වීදි විරෝධතා මැද අද රාත්‍රියේ ආණ්ඩුව ව්‍යවස්ථා සංශෝධන පනත් කෙටුම්පත වැඩිඡන්ද 95 කින් ජයගත්තේය.