විනාඩි විස්සකින් ඩොලර් බිලියන 6.3ක් අතුරුදන් කළ ලෝකයේ දැවැන්තම ඩිජිටල් මුදල් කොල්ලය!

ලෝකයේ විශාලතම ඩිජිටල් මුදල් හුවමාරු ආයතනයට ඇතුළු වූ සොරුන් පිරිසක් විනාඩි විස්සක් පමණ ඇතුළත ඇමෙරිකානු ඩොලර් බිලියන 6.3ක වටිනාකමකින් යුත් මුදල් සොරාගෙන තිබේ. කිසිදු බැංකුවක දොරක් කඩා නැත. ආරක්ෂක සේප්පුවක් විවෘත කර නැත. මුදල් රැගෙන පලා යන වාහනයක් ද නැත. එහෙත් ලෝක මූල්‍ය ඉතිහාසයේ වාර්තා වූ දැවැන්තම සොරකම් අතරට එක්වන අපරාධයක් සිදුවී අවසන්ය.

</p>

<p>

මේ කොල්ලයේ ගොදුර වී ඇත්තේ ලෝකයේ විශාලතම ක්‍රිප්ටෝ මුදල් හුවමාරු ආයතනය වන බයිනෑන්ස් (Binance) සමාගමය. ඔක්තෝබර් 29 වැනි බ්‍රහස්පතින්දා සිදු වූ ප්‍රහාරයෙන් සොරාගත් මුදල ඩොලර් මිලියන 6,300කි. එය සාමාන්‍ය බැංකු කොල්ලයකින් අහිමි වන මුදලකට කිසිසේත් සම කළ නොහැකි ප්‍රමාණයකි.

</p>

<p>

මෙය ලෝකයේ මෙතෙක් වාර්තා වූ විශාලතම ක්‍රිප්ටෝ මුදල් කොල්ලය බව රොයිටර්ස් පුවත් සේවය තහවුරු කර තිබුණේය.

</p>

<p>

<span style="color:#dc2626">මුදල් අතුරුදන් වූ විනාඩි විස්ස</span>

</p>

<p>

සිද්ධිය ආරම්භ වූයේ බ්‍රහස්පතින්දා ජාත්‍යන්තර සම්මත වේලාවෙන් රාත්‍රී අට පසුවී සුළු වේලාවකිනි. බයිනෑන්ස් ආයතනයේ ගනුදෙනු සඳහා භාවිත කරන ඩිජිටල් මුදල් ගබඩාවලින් අතිවිශාල වටිනාකමකින් යුත් වත්කම් වෙනත් ලිපින වෙත මාරු වීමට පටන් ගත්තේය.

</p>

<p>

ඩිජිටල් මුදල් ගනුදෙනු පිළිබඳ විමර්ශනය කරන ඇමෙරිකානු ආයතනයක් වන TRM Labs අනුව, සොරකමේ ප්‍රධාන කොටස සිදු වී ඇත්තේ විනාඩි විස්සක් පමණ ඇතුළතය. වෙනස් ඩිජිටල් ගනුදෙනු ජාල දහයක් ඔස්සේ මුදල් ඉවත් කර තිබේ.

</p>

<p>

<span style="color:#dc2626">ඩිජිටල් මුදල් යනු මොනවාද?</span>

</p>

<p>

අප භාවිත කරන රුපියල් හෝ ඩොලර් නෝට්ටු මෙන් ඩිජිටල් මුදල් අතින් ඇල්ලිය නොහැකිය. ඒවා අන්තර්ජාලය ඔස්සේ මිලදී ගත හැකි, විකිණිය හැකි සහ වෙනත් අයකුට යැවිය හැකි වත්කම් විශේෂයකි. බිට්කොයින් එවැනි මුදල් වර්ගයකි. මේවායේ හිමිකාරිත්වය සහ ගනුදෙනු විශේෂ පරිගණක ජාලයක සටහන් වේ. මුදල් හිමියා තම වත්කම් පාලනය කිරීමට ඩිජිටල් මුදල් පසුම්බියක් භාවිත කරයි.

</p>

<p>

එහි ඇති ආරක්ෂක ක්‍රම බිඳ දැමීමෙන් හෝ ගනුදෙනු අනුමත කරන පද්ධතියකට අනවසරයෙන් ඇතුළු වීමෙන් සොරුන්ට එම වත්කම් වෙනත් ඩිජිටල් පසුම්බියකට මාරු කළ හැකිය.

</p>

<p>

එහෙත් එසේ සොරාගත් ඩිජිටල් මුදල් ඉබේම සැබෑ ඩොලර් බවට පත් වන්නේ නැත. ඒ සඳහා ඒවා ඩිජිටල් මුදල් වෙළෙඳපොළක විකිණිය යුතුය. එවිට ලැබෙන ඩොලර්, අදාළ ආයතනයේ නීති සහ පරීක්ෂණවලට යටත්ව බැංකු ගිණුමකට ලබාගත හැකිය. එසේ නැතහොත් ඩොලරයේ වටිනාකමට සම්බන්ධ කර ඇති වෙනත් ඩිජිටල් මුදල් වර්ගයකට හුවමාරු කළ හැකිය. නමුත් එය බැංකුවක ඇති සැබෑ ඩොලර් ලබාගැනීමට සමාන නොවේ. සොරකමකින් ලැබුණු වත්කම් හඳුනාගෙන අත්හිටුවීමට ද ඇතැම් අවස්ථාවල හැකියාව තිබේ.

</p>

<p>

මෙවර සොරුන් ප්‍රයෝජනයට ගෙන ඇත්තේ ඩිජිටල් මුදල් ගනුදෙනු අනුමත කිරීමේ ක්‍රියාවලියේ ආරක්ෂක දුර්වලතාවකි.

</p>

<p>

<span style="color:#dc2626">කොල්ලයට දොර විවෘත වූයේ කෙසේද?</span>

</p>

<p>

මුල් විමර්ශනයේදී බයිනෑන්ස් සමාගම සඳහන් කළේ තම ඉංජිනේරුවකුගේ අතේ ගෙන යා හැකි පරිගණකයක් හරහා අනවසර ප්‍රවේශයක් ලබාගෙන ඇති බවය. එහෙත් පසුව කළ විමර්ශනවලදී තවත් ආරක්ෂක බිඳවැටීම් හඳුනාගෙන ඇති බව සමාගම පිළිගත්තේය. ඒවායේ සම්පූර්ණ ස්වභාවය මෙතෙක් ප්‍රසිද්ධ කර නැත.

</p>

<p>

TRM Labs ආයතනයේ විශ්ලේෂණයට අනුව ප්‍රහාරකයන්ට මුදල් මාරු කිරීමේ නියෝග අනුමත කරන පද්ධතියට බලපෑම් කිරීමට හැකි වී තිබේ. ඒ ඔස්සේ අනවසර ගනුදෙනු සිදු කර මුදල් පිටතට යවා ඇත.

</p>

<p>

බයිනෑන්ස් සම ප්‍රධාන විධායක නිලධාරී රිචඩ් ටෙන්ග් පැහැදිලි කර ඇත්තේ මෙය එක් පරිගණක බොත්තමක් එබීමෙන් කළ සරල ප්‍රහාරයක් නොවන බවය. ගනුදෙනු සඳහා යොදාගන්නා රහස් ආරක්ෂක යතුරු පිටවී ඇති බවට ද සාක්ෂි හමුවී නැත.

</p>

<p>

එබැවින් කොල්ලය සිදු කළ නිශ්චිත තාක්ෂණික ක්‍රියාවලිය තවමත් විමර්ශනයට ලක්වෙමින් තිබේ.

</p>

<p>

<span style="color:#dc2626">සොරාගත් මුදලින් අඩක් නතර කළ සටන</span>

</p>

<p>

ප්‍රහාරය අනාවරණය වූ වහාම බයිනෑන්ස් ආයතනය තැන්පතු භාරගැනීම සහ මුදල් ආපසු ලබාගැනීම තාවකාලිකව අත්හිටුවීය. අනතුරුව ආරම්භ වූයේ සොරුන් මාරු කරමින් සිටි මුදල් සොයා ඒවා තවදුරටත් භාවිත කිරීම වැළැක්වීමේ මෙහෙයුමකි.

</p>

<p>

ඔක්තෝබර් 30 වැනිදා වනවිට ඩොලර් බිලියන තුනකට ආසන්න වටිනාකමකින් යුත් වත්කම් හඳුනාගෙන අත්හිටුවීමට අදාළ ආයතන සමත් වී තිබිණි. එහිදී ටෙදර් (Tether) සමාගම ඩොලර් බිලියන 1.57කට ආසන්න වත්කම් ද, සර්කල් (Circle) සමාගම ඩොලර් මිලියන 800කට වැඩි වත්කම් ද අත්හිටුවා තිබේ.

</p>

<p>

මෙය කළ හැකි වූයේ එම සමාගම් නිකුත් කරන ඇතැම් ඩිජිටල් මුදල් ඒකක භාවිතය දුරස්ථව අත්හිටුවීමට ඔවුන්ට තාක්ෂණික හැකියාව තිබීම නිසාය.

</p>

<p>

එහෙත් ඉතිරි ඩොලර් බිලියන 3.3ක පමණ වත්කම්වල අවසන් තත්ත්වය මෙතෙක් පැහැදිලි නැත. අත්හිටුවූ මුදල් සියල්ල සමාගමට ආපසු ලැබී ඇතැයි ද ප්‍රකාශ කළ නොහැක.

</p>

<p>

කොල්ලය පසුපස උතුරු කොරියාව සිටී ද?<span style="color:#dc2626">

</span>

</p>

<p>

මේ අපරාධයේ වඩාත් බරපතළ පැතිකඩ අනාවරණය වන්නේ සොරුන්ගේ අනන්‍යතාව සොයා යන විටය.

</p>

<p>

ඇමෙරිකානු ඩිජිටල් මුදල් විමර්ශන ආයතන කිහිපයක් ප්‍රහාරයේ ස්වභාවය උතුරු කොරියාවට සම්බන්ධ පරිගණක අපරාධකරුවන්ගේ පෙර ක්‍රියාකාරකම්වලට සමාන බව හඳුනාගෙන තිබේ.

</p>

<p>

TRM Labs ආයතනය මෙම කොල්ලය උතුරු කොරියාවට සම්බන්ධ ප්‍රහාරක කණ්ඩායමක් විසින් සිදු කළ බවට ඉහළ විශ්වාසයක් පළ කරයි. එම සැකයට හේතුවක් තිබේ.

</p>

<p>

2025 පෙබරවාරියේදී බයිබිට් (Bybit) නමැති ඩිජිටල් මුදල් හුවමාරු ආයතනයෙන් ඩොලර් බිලියන 1.5ක් සොරාගනු ලැබීය. එම ප්‍රහාරය සිදු කළේ උතුරු කොරියාවට සම්බන්ධ TraderTraitor කණ්ඩායම බව ඇමෙරිකානු ෆෙඩරල් විමර්ශන කාර්යාංශය පසුව නිල වශයෙන් ප්‍රකාශ කළේය.

</p>

<p>

එහෙත් මෙවර බයිනෑන්ස් කොල්ලයේ අපරාධකරුවන්ගේ අනන්‍යතාව නිල වශයෙන් තහවුරු කර නැත. උතුරු කොරියාව ද මෙවැනි අපරාධවලට සම්බන්ධ බව ප්‍රතික්ෂේප කරයි.

</p>

<p>

<span style="color:#dc2626">ලෝක මුල්‍ය වෙළෙඳපොළට වැදුණු පහර</span>

</p>

<p>

කොල්ලය අනාවරණය වීමත් සමඟ ඩිජිටල් මුදල් වෙළෙඳපොළේ මිල ගණන් පහත වැටිණි.

</p>

<p>

බිට්කොයින් ඒකකයක මිල ඩොලර් 76,368 දක්වා පහත වැටුණු අතර, ඊතර් ඒකකයක මිල ඩොලර් 2,178 දක්වා අඩු විය. බයිනෑන්ස් ආයතනයට සම්බන්ධ BNB මුදල් ඒකකයේ මිල ද පහත වැටිණි.

</p>

<p>

කෙසේ වෙතත් බයිනෑන්ස් සමාගම සිය ගනුදෙනුකරුවන්ගේ මුදල් සුරක්ෂිත බව ප්‍රකාශ කර තිබේ. පාඩු පියවීම සඳහා සමාගමේම මුදල් යොදවන බවත්, ඒ වෙනුවෙන් ඩොලර් බිලියන 6.34ක පමණ මුදලක් වෙන් කර ඇති බවත් සඳහන් කරයි.

</p>

<p>

ඇමෙරිකානු ෆෙඩරල් විමර්ශන කාර්යාංශය සහ රහස් සේවය ද සොරාගත් වත්කම් සොයාගැනීමේ කටයුතුවලට සම්බන්ධ වී සිටිති.

</p>

<p>

<span style="color:#dc2626">ලෝකයේ විශාලතම කොල්ලය ඉතිරි කළ ප්‍රශ්නය</span>

</p>

<p>

බයිනෑන්ස් සමාගමට ලොව පුරා ලියාපදිංචි ගනුදෙනුකරුවන් මිලියන 335ක් සිටිති. එවැනි ආයතනයක ආරක්ෂක පද්ධතියක් බිඳ දැමීමට හැකි වීම සමස්ත ඩිජිටල් මුදල් වෙළෙඳපොළේ විශ්වාසනීයත්වයට එල්ල වූ බරපතළ අභියෝගයකි.

</p>

<p>

මෙතෙක් හෙළි වී ඇති තොරතුරු අනුව සොරුන් මුදල් ගබඩාවේ ආරක්ෂක යතුර සොරාගත් බවක් තහවුරු වී නැත. ඔවුන්ට හැකි වී ඇත්තේ මුදල් පිටතට යැවීමේ නියෝග අනුමත කරන ක්‍රියාවලියට බලපෑම් කිරීමටය.

</p>

<p>

එය මේ කොල්ලයේ වැදගත්ම අනාවරණයයි.

</p>

<p>

ලෝකයේ විශාලතම ඩිජිටල් මුදල් හුවමාරු ආයතනයට විනාඩි විස්සක් තුළ ඩොලර් බිලියන ගණනක වත්කම් අහිමි වූයේ මුදල් ආරක්ෂා කළ යුතු පද්ධතියම අනවසර ගනුදෙනු සඳහා යොදාගැනීමෙනි.

</p>

<p>

දැන් පිළිතුරු සෙවිය යුත්තේ සොරුන් මුදල් රැගෙන ගියේ කෙසේද යන්නට පමණක් නොවේ. එවැනි අනවසර ගනුදෙනුවලට අවසර ලැබෙන තෙක් ලෝකයේ විශාලතම ඩිජිටල් මුදල් හුවමාරු ආයතනයේ ආරක්ෂක පද්ධතිය අසමත් වූයේ කෙසේද යන්නටය.