ප්‍රවීණ සජීවීකරණ සිනමා අධ්‍යක්ෂ ගිවන්ත අර්ථසාද් අභාවප්‍රාප්ත වෙයි!

ශ්‍රී ලංකාවේ සිනමාව, රූපවාහිනී මාධ්‍යය, දෘශ්‍ය කලා සහ තාක්ෂණික ශිල්පීය ක්ෂේත්‍රය වෙනුවෙන් දශක පහකට අධික කාලයක් අසමසම මෙහෙවරක් ඉටු කළ ප්‍රවීණ කාටූන් ශිල්පී, විශේෂ දර්ශන ප්‍රයෝග ශිල්පී, චිත්‍රපට හා කලා අධ්‍යක්ෂ, චිත්‍ර හා මූර්ති ශිල්පී මෙන්ම ජ්‍යෙෂ්ඨ මාධ්‍යවේදී ගිවන්ත අර්ථසාද් අභාවප්‍රාප්ත වී තිබේ.

</p>

<p></p>

<p>

1950 ඔක්තෝබර් 14 වැනිදා කටුනායකදී උපත ලැබූ ඔහු, මියයන විට 73 වැනි වියෙහි පසුවිය. බමිණිහැන්නැදිගේ ගිවන්ත අර්ථසාද් පීරිස් වන ඔහු, කුඩා කල සිටම කලාත්මක සහ ශාස්ත්‍රීය පසුබිමක හැදී වැඩුණෙකි. කොළඹ වෙස්ලි විද්‍යාලයෙන් අධ්‍යාපනය ලබන සමයේදී ඔහු තුළ පැවැති අතිවිශේෂ චිත්‍ර හා නිර්මාණ ශක්‍යතාවන් හඳුනාගත් ගුරුවරුන්, ඔහුව විද්‍යා විෂයයන්ගෙන් ඔබ්බට කලා ක්ෂේත්‍රය දෙසට යොමු කිරීමට උනන්දු කරවන ලදී.

</p>

<p></p>

<p>

<span style="color:#dc2626">දේශීය සජීවීකරණ (Animation) සිනමාවේ විප්ලවය</span>

</p>

<p></p>

<p>

ඩිජිටල් තාක්ෂණය තබා මූලික කැමරා පහසුකම් පවා අවම පැවති යුගයක, තමන් විසින්ම සකස් කරගත් උපකරණ සහ කැමරා තාක්ෂණයන් භාවිත කරමින් ලාංකේය සිනමාවට සජීවීකරණ කලාංගය හඳුන්වා දීමට ගිවන්ත අර්ථසාද් කටයුතු කළේය. 1971 වසරේදී 'අන්දරේ' සහ 1972 වසරේදී 'මුහුද යටින් ඉර පායයි' යන කෙටි සජීවීකරණ චිත්‍රපට නිර්මාණය කරමින් ඔහු විචාරක පැසසුමට ලක්විය.

</p>

<p></p>

<p>

<figure style="margin:1.5rem 0;text-align:center"><img src="https://assets.roar.media/assets/C2dfMNVnMTH3BBw9_Article-Cover.jpg?w=1200" alt="" style="max-width:100%;border-radius:6px" /><figcaption style="font-size:0.85em;color:#6b7280;margin-top:0.4rem"></figcaption></figure>

ඉන්පසුව, 1979 වසරේදී ශ්‍රී ලංකා සිනමා ඉතිහාසයේ ප්‍රථම සජීවීකරණ (කාටූන්) දීර්ඝ සිනමාපටය ලෙස 'දුටුගැමුණු' චිත්‍රපටය නිර්මාණය කර තිරගත කරමින් ඔහු දේශීය සිනමාවේ නව පිටුවක් පෙරළීය. දහස් ගණනක් වූ චිත්‍ර රාමු (Frames) එකින් එක අතින් ඇඳ, ඉන්දියන් තීන්ත යොදා ගනිමින් කළ ඒ අතිවිශාල කැපකිරීම, එදා මෙරට සිනමා රසිකයන්ගේ මහත් හරසරට ලක්විය.

</p>

<p></p>

<p>

අනතුරුව 2001 වසරේදී ශ්‍රී ලංකාවේ ප්‍රථම ඩිජිටල් වර්ණ කාටූන් සිනමාපටය වන 'මහදැනමුත්තයි ගෝලයො රොත්තයි' නිර්මාණය කර 2002 දී ජනගත කිරීමට ද ඔහු කටයුතු කළේය. අභාවප්‍රාප්ත වන විටත් 'මුතු ඇටයේ මෝඩයෝ' නමැති නවතම සිනමාපටය නිර්මාණය කර ප්‍රේක්ෂකාගාරයට තිළිණ කිරීමේ දැඩි බලාපොරොත්තුවෙන් ඔහු පසුවිය.

</p>

<p></p>

<p>

<span style="color:#dc2626">රූපවාහිනී මාධ්‍යයට සහ දෘශ්‍ය කලාවට කළ මෙහෙවර</span>

</p>

<p></p>

<p>

ශ්‍රී ලංකාවට රූපවාහිනී මාධ්‍යය හඳුන්වාදීමේ මුල්කාලීන පියවරයන් සඳහා සක්‍රීයව දායක වූ ඔහු, ස්වාධීන රූපවාහිනිය (ITN) රජයට පවරාගත් පසු එහි අධ්‍යක්ෂවරයෙකු ලෙස ද සේවය කළේය. පසුව ජාතික රූපවාහිනී සංස්ථාව ආරම්භක යුගයේදී එහි ජර්මන් තාක්ෂණික පුහුණුව ලබා පැමිණ, රූපවාහිනී සංස්ථාවේ ග්‍රාෆික්ස්, සජීවීකරණ, වේෂ නිරූපණ සහ පසුතල නිර්මාණ අංශයන්හි නියෝජ්‍ය අධ්‍යක්ෂවරයා ලෙස පුරෝගාමී මෙහෙයක් ඉටු කළේය.

</p>

<p></p>

<p>

ඊට අමතරව, මෙරට සිනමා ඉතිහාසයේ ප්‍රථම 'ඔප්ටිකල් ප්‍රින්ටරය' (Optical Printer) නිර්මාණය කිරීමට ආචාර්ය ලෙස්ටර් ජේම්ස් පීරිස් මහතාගේ ඉල්ලීම පරිදි දායක වූයේ ද ගිවන්ත අර්ථසාද් මහතාය. එම යන්ත්‍රය පසුව ටයිටස් තොටවත්තයන්ගේ 'මරුවා සමග වාසේ' වැනි චිත්‍රපට සඳහා යොදාගන්නා ලදී. මුද්දර නිර්මාණකරණය, ප්‍රකාශන චිත්‍ර, හඬ කැවීම්, නාට්‍ය සහ සිංහල භාෂා ප්‍රවීණතා ඇතුළු අංශ අටක විශේෂඥ දැනුමක් හෙබි බහුමානීය කලාකරුවෙකු වූ ඔහු, දේශීය මුද්දර වංශයට ද අගනා නිර්මාණ රැසක් එකතු කර ඇත.

</p>

<p></p>

<p>

තාක්ෂණික බාධක රැසක් හමුවේ වුවද තමන්ගේම නිර්මාණශීලී හැකියාවෙන් සහ අසීමිත කැපවීමෙන් දේශීය සිනමාව සහ විද්‍යුත් මාධ්‍ය ක්ෂේත්‍රය පෝෂණය කළ ගිවන්ත අර්ථසාද් මහතාගේ වියෝව, දේශීය කලා කෙතට පියවිය නොහැකි අතිමහත් පාඩුවකි.