කාන්තා T20 ආසියානු කුසලානය ඉන්දියාවට. ඉන්දියාව ලකුණු 72කින් ශ්‍රි ලංකාව පරාජය කරයි!

ඩුබායි ජාත්‍යන්තර ක්‍රිකට් ක්‍රීඩාංගණයේ පැවැති 2026 කාන්තා විස්සයි20 (T20) ආසියානු කුසලාන අවසන් මහා තරගයේදී ශ්‍රී ලංකා කණ්ඩායම ලකුණු 72කින් බරපතල ලෙස පරාජය කරමින් ශූරතාව දිනා ගැනීමට ඉන්දීය කණ්ඩායම සමත් විය.

</p>

<p>

තරගයේ කාසිය වාසිය දිනා පළමුවෙන් පන්දුවට පහරදුන් ඉන්දියාව නියමිත ඕවර 20 අවසානයේ කඩුලු 5ක් දැවී ලකුණු 183ක් රැස් කළේය. ලකුණු 184ක ඉලක්කයක් හඹා ගිය ශ්‍රී ලංකා කණ්ඩායමට සියලු දෙනා දැවී රැස් කරගත හැකි වූයේ ලකුණු 111ක් පමණි.

</p>

<p>

කණ්ඩායම් දෙකම අවසන් මහා තරගයට පිවිසුණේ තරගාවලිය පුරා අපරාජිතවය. ඉන්දියාව අවසන් පූර්ව තරගයේදී බංග්ලාදේශය ලකුණු 40කින් පරාජය කළ අතර, ශ්‍රී ලංකාව පාකිස්තානය කඩුලු 4කින් පරාජය කරමින් අවසන් තරගයට සුදුසුකම් ලබා ගත්තේය. 2024 වසරේදී ඉන්දියාව පරාජය කරමින් ශූරතාව දිනාගත් ශ්‍රී ලංකා කණ්ඩායම මෙවරද එම ශූරතාව රැක ගැනීමට උත්සාහ කළද, ඉන්දීය පිතිකාරිනියන්ගේ වේගවත් ප්‍රහාරාත්මක රටාව සහ පන්දු යැවීමේ පීඩනය හමුවේ එම උත්සාහය ව්‍යර්ථ විය.

</p>

<p>

මේ ජයග්‍රහණයත් සමඟ කාන්තා ආසියානු කුසලාන ඉතිහාසයේ වැඩිම ශූරතා සංඛ්‍යාවකට හිමිකම් කියමින් අටවැනි වරටත් කුසලානය ඔසවා තැබීමට ඉන්දියාව සමත් විය.

</p>

<p>

<span style="color:#dc2626">ෂෆාලි- මන්දනා වාර්තාගත ආරම්භක සබඳතා‍වය</span>

</p>

<p>

තරගයේ ඉරණම තීරණය වූයේ ඉන්දීය ඉනිමේ පළමු ඕවර 13 තුළදීය. ඉන්දීය ආරම්භක පිතිකාරිණියන් වූ ෂෆාලි වර්මා සහ ස්මෘති මන්දනා පළමු කඩුල්ල වෙනුවෙන් ලකුණු 129ක නොබිඳුණු සබඳතාවක් ගොඩනැඟූහ. එය කාන්තා T20 අවසන් මහා තරගයක ඕනෑම කඩුල්ලක් සඳහා වාර්තා වූ ඉහළම සබඳතාව වන අතර, කාන්තා ආසියානු කුසලාන තරගාවලි ඉතිහාසයේද ඕනෑම කඩුල්ලක් සඳහා වාර්තා වූ ඉහළම සබඳතාව වේ.

</p>

<p>

ෂෆාලි පන්දු 24කින් තම අර්ධ ශතකය සම්පූර්ණ කළාය. එය කාන්තා ආසියානු කුසලාන ඉතිහාසයේ වේගවත්ම අර්ධ ශතකය ලෙස සටහන් විය. මීට පෙර එම වාර්තාවට හිමිකම් කීවේ 2022 අවසන් මහා තරගයේදී ශ්‍රී ලංකාවට එරෙහිව පන්දු 25කින් අර්ධ ශතකය ලබාගත් මන්දනා සතුවය. ෂෆාලි පන්දු 39කදී හතරේ පහර 9ක් සහ හයේ පහර 2ක් සමඟින් ලකුණු 68ක් රැස් කළාය. මන්දනා පන්දු 39කදී හතරේ පහර 5ක් සහ හයේ පහර 3ක් සමඟින් ලකුණු 59ක් ලබා ගත්තාය. ඇය ලබාගත් 36 වැනි T20 ජාත්‍යන්තර අර්ධ ශතකය මෙයයි.

</p>

<p>

ඉනිමේ 12.5 වැනි ඕවරයේදී චමුදි ප්‍රබෝධාගේ පන්දුවකට කවර් කලාපයේ සිටි චමරි අතපත්තු අතට උඩපන්දුවක් දෙමින් ලකුණු 129දී ෂෆාලි දැවී ගියාය. ඊට නොබෝ වේලාවකට පසු කවිෂා දිල්හාරිගේ විශිෂ්ට පන්දු රැකගැනීම හමුවේ හාර්මන්ප්‍රීත් කෞර් සමඟ ඇති වූ සංඥා මගහැරීමකින් මන්දනා දුවද්දී දැවී යාමකට ලක් වූවාය.

</p>

<p>

එතැන් සිට ඉන්දීය මැදපෙළ පිතිකාරිනියන්ට ලකුණු ලබාගැනීම පාලනය කිරීමට ශ්‍රී ලංකා පන්දු යවන්නියෝ සමත් වූහ. හාර්මන්ප්‍රීත් ලකුණු 14ක්ද, රිචා ඝෝෂ් ලකුණු 17ක්ද ලබාගත් අතර, අවසාන ඕවර පහේදී ඉන්දියාවට ලබාගත හැකි වූයේ ලකුණු 43ක් පමණි. කෙසේ වෙතත් ගුනාලන් කමලිනි පන්දු 5කදී නොදැවී ලකුණු 15ක් (හතරේ පහර 1ක් සහ හයේ පහර 1ක්) රැස් කරමින් ඉන්දීය ඉනිම ලකුණු 180 සීමාවෙන් ඔබ්බට ගෙන ගියාය.

</p>

<p>

ශ්‍රී ලංකා පන්දු යැවීමේදී මිථලි අයෝධ්‍යා, චමරි අතපත්තු සහ චමුදි ප්‍රබෝධා කඩුල්ල බැගින් දවා ගත්හ. සුගන්ධිකා කුමාරි ඕවර 4කදී ලකුණු 31ක් පමණක් ලබා දුන්නද ඇයට කඩුල්ලක් හිමි නොවීය.

</p>

<p>

<span style="color:#dc2626">ශ්‍රී ලංකා පිළිතුරු ඉනිම බිඳ වැටෙයි

</span>

</p>

<p>

ලකුණු 184ක ජයග්‍රාහී ඉලක්කයක් හඹා ගිය ශ්‍රී ලංකා කණ්ඩායමට ආරම්භයේ සිටම ඉහළ ලකුණු ලබාගැනීමේ වේගයක් පවත්වා ගැනීමට අවශ්‍ය විය. එහෙත් පළමු ඕවරයේදීම ඉමේෂා දුලානි, ක්‍රාන්ති ගෞඩ්ගේ පන්දුවක් හමුවේ දැවී ගියහ.

</p>

<p>

දෙවැනි කඩුල්ල වෙනුවෙන් චමරි අතපත්තු (පන්දු 32කදී ලකුණු 36 – හතරේ පහර 4, හයේ පහර 2) සහ විශ්මි ගුණරත්න (පන්දු 22කදී ලකුණු 20) ලකුණු 58ක සබඳතාවක් ගොඩනැඟූහ. එහෙත් දීප්ති ෂර්මා ක්‍රියාත්මක කළ එකම ඕවරයකදී එම කඩුලු දෙකම බිඳ වැටිණි. චමරි ස්ටම්ප් කිරීමකට ලක්ව දැවී ගිය අතර විශ්මි කෙළින්ම පන්දුව කඩුල්ලේ වැදීමෙන් (Bowled) දැවී ගියාය. එතැන් සිට ශ්‍රී ලංකාවට අවශ්‍ය ලකුණු ලබාගැනීමේ වේගය (Required Run Rate) සීඝ්‍රයෙන් ඉහළ ගියේය.

</p>

<p>

නිලක්ෂිකා සිල්වා පන්දු 16කදී ලකුණු 22ක් රැස් කළද, ශ්‍රී චරණිගේ පන්දු යැවීම ශ්‍රී ලංකා මැද සහ පසු පෙළට දැඩි බාධාවක් විය. ඇය ඕවර 3.5කදී ලකුණු 11කට කඩුලු 4ක් දවා ගැනීමට සමත් වූවාය. හර්ෂිතා සමරවික්‍රම, කවිෂා දිල්හාරි, නිලක්ෂිකා සිල්වා සහ සුගන්ධිකා කුමාරි ඇයගේ ගොදුරු විය. ඊට අමතරව ෂෆාලි වර්මා විසින් හසිනි පෙරේරාගේ කඩුල්ල දවා ගන්නා ලදී.

</p>

<p>

පසුගිය තරගාවලියේ ශූරියන් වූ ශ්‍රී ලංකා කණ්ඩායමේ පිතිහරඹය මෙවර අවසන් තරගයේදී ඉන්දීය දඟපන්දු යවන්නියන්ගේ පීඩනය හමුවේ බිඳවැටිනි. ඇය වැනි ක්‍රීඩිකාවක් ඒ අවස්ථාවේ දී නොකළ යුතු ලෙස චමරී අතපත්තු සිය කඩුල්ල පූජා කළාය. චමරි අතපත්තුගේ දැවී යාමෙන් පසුව කිසිදු පිතිකාරිනියකට තරගයේ නිරත වෙමින් ඉනිම ගොඩනැඟීමට නොහැකි විය.

</p>

<p>

<span style="color:#dc2626">තරගාවලියේ පසුබිම සහ කණ්ඩායම් ශක්තිය</span>

</p>

<p>

ඉන්දියාව මෙවර තරගාවලියේදී කාණ්ඩ වටයේ සියලු තරග ජයග්‍රහණය කරමින් 5.471ක ශුද්ධ ලකුණු ලබාගැනීමේ වේගයක් (Net Run Rate) පවත්වා ගැනීමට සමත් විය. ෂෆාලි වර්මා තරගාවලියේ වැඩිම ලකුණු ලාභිනිය බවට පත්වූ අතර දීප්ති ෂර්මා වැඩිම කඩුලු ලාභිනියන් අතර පෙරමුණ ගත්තාය. ඉන්දියාව අවසන් මහා තරගය සඳහා ප්‍රතිකා රාවල් වෙනුවට යොවුන් ක්‍රීඩිකා කමලිනි කණ්ඩායමට කැඳවූ අතර එය ඇයගේ දෙවැනි T20 ජාත්‍යන්තර තරගය විය.

</p>

<p>

ශ්‍රී ලංකාවද කාණ්ඩ වටය ජයග්‍රහණ තුනක් අපරාජිතව හිදිමින් අවසන් කළේය. චමරි අතපත්තු තරගාවලිය පුරා පන්දු යැවීමෙන්ද දක්ෂතා දැක්වූවාය. එහෙත් අවසන් මහා තරගයේදී ඉන්දීය මුල් පෙළ පිතිකාරිනියන්ගේ ප්‍රහාරය හමුවේ ශ්‍රී ලංකා පන්දු යැවීමේ බලඇණියට මුල් ඕවරවලදී පාලනයක් පවත්වා ගැනීමට නොහැකි විය. මෙවර ශ්‍රී ලංකා කණ්ඩායම යොවුන් ක්‍රීඩිකාවන් කිහිප දෙනෙකු සමඟින් තරගාවලියට අවතීර්ණ වූ අතර, අවසන් මහා තරගයක ඇති අත්දැකීම් සහ ඉන්දීය කණ්ඩායමේ ක්‍රීඩිකාවන්ගේ පරිණතභාවය අතර වෙනස තරගයේදී පැහැදිලිව දක්නට ලැබිණි.

</p>

<p>

2024 අවසන් මහා තරගයේදී ශ්‍රී ලංකාව හමුවේ ලැබූ පරාජයට මෙවර ඉන්දියාව පිළිතුරු දුන්නේ ආරම්භක යුගලයේ ප්‍රහාරාත්මක පිතිහරඹයෙනි. ඩුබායි ක්‍රීඩාංගණයේ තණතීරුව පිතිකරණයට පහසු එකක් නොවන බව ඉන්දීය නායිකා හර්මන්ප්‍රීත් කෞර් මීට පෙර ප්‍රකාශ කර තිබුණද, ෂෆාලි සහ මන්දනා එම තත්ත්වයන් සාර්ථකව ජය ගත්හ.

</p>

<p>

<span style="color:#dc2626">තරගයෙන් ඉතිරි වන පාඩම

</span></p>

<p>

මෙම අවසන් මහා තරගය දෙපිළේම ශක්තීන් සහ දුර්වලතා පැහැදිලිව අනාවරණය කළේය. ඉන්දියාව සතුව ප්‍රබල පිතිහරඹ බලඇණියක්, වේගවත් ආරම්භයක් සහ කඩුලු ලබාගන්නා දඟපන්දු යවන්නියන් පිරිසක් සිටියහ. ශ්‍රී ලංකාව සතුව චමරිගේ නායකත්වය, අවසන් පූර්ව තරගයේදී පෙන්නුම් කළ සටන්කාමී ක්‍රීඩා විලාසය සහ යොවුන් ක්‍රීඩිකාවන්ගේ උද්‍යෝගය තිබිණි. එහෙත් ලකුණු 180කට වැඩි විශාල ඉලක්කයක් හඹා යාමේදී අවශ්‍ය වන සාර්ථක ආරම්භය සහ මැදපෙළේ වේගවත් ලකුණු රැස්කිරීම යන කරුණු දෙකම ශ්‍රී ලංකා ඉනිම තුළ එකවර දක්නට නොලැබිණි.

</p>

<p>

ශ්‍රී ලංකා කාන්තා ක්‍රිකට් කණ්ඩායම මෙවරද අවසන් මහා තරගය දක්වා පැමිණීම පැසසිය යුතු කරුණකි. එහෙත් ඉන්දියාව වැනි ප්‍රබල කණ්ඩායමක් සමඟ තරගකාරී ලෙස ඉදිරියට යාමට නම්, මුල් පෙළ පිතිහරඹයේ වේගය සහ පන්දු යැවීමේ විවිධත්වය තවදුරටත් වර්ධනය කරගත යුතු බව මෙම තරගය නැවතත් පෙන්වා දුන්නේය.